खोजखबर

निर्वाचनमा गरेका प्रतिबद्धता पूरा गर्छुः महासचिव पोखरेल

सौर्य अनलाइन २०७४ मंसिर २६ गते १७:२४ मा प्रकाशित

काठमाडौँ, २६ मंसिर । काठमाडौं निर्वाचन क्षेत्र नं ५ बाट निर्वाचित भएका नेकपा एमालेका महासचिव ईश्वर पोखरेलले आफ्नो निर्वाचन क्षेत्रको विकास गर्ने प्रतिबद्धता व्यक्त गरेका छन् ।

मंगलबार लैनचौरमा आयोजित विजय र्यालीलाई सम्बोधन गर्दै उनले चुनावका क्रममा आफूले जनतासमक्ष राखेका प्रतिबद्धता पूरा गर्ने बताए ।

उनले वाम गठबन्धनले निर्वाचनमा बहुमतसहित विजय हासिल गरेकाले जनताको चाहनाअनुसार काम गर्ने बताए ।

महासचिव पोखरेलले सरकार गठनपछि आफूहरुको ध्यान चुनावका क्रममा मतदातासँग गरिएका प्रतिबद्धता पूरा गर्नतर्फ रहने बताए ।

हामीले चुनावमा जुन प्रतिबद्धता व्यक्त गरेका थियौं, ती प्रतिबद्धतालाई कतिपयले सपना भनेका थिए । तर हामी ती प्रतिबद्धतालाई पूरा गरेर मुलुकलाई विकास तर्फ लैजान्छौ, उनले भने ।

उनले चाँडै नै वाम गठबन्धनको सरकार बन्ने समेत बताए ।  निर्वाचन क्षेत्र नंं ५ मेडिकल कलेजको हब भएको भन्दै उनले जनतालाई स्थानीय सरकारसँग समन्वय गरेर स्वास्थ्य बीमा सञ्चालन गर्ने धारणा राखे ।

सभामा उनले गहनापोखरी, हाँडीगाउँ जस्ता ऐतिहासिक ठाउँलाई संरक्षण गर्ने समेत बताए ।

लैनचौरबाट शुरु भएको विजय र्याली रानीवारी, बसुन्धरा, धापासी, बूढानीलकण्ठ, चण्डौल, नक्साल हुँदै गहना पोखरीमा पुगी समापन भएको थियो ।

र्यालीमा प्रदेश सभाका विजयी उम्मेदवार नारायणबहादुर सिलवाल र दीपक निरौलासहित एमालेका प्रचार विभाग उपप्रमुख सूर्य थापाको सहभागिता रहेको थियो ।

र्यालीका क्रममा मतदाताले महासचिव पोखरेललाई बधाई दिएका थिए ।

प्रतिक्रिया