रंग‍-विविध

‘एलियनको पृथ्वी भ्रमण’ लोकार्पण

सौर्य अनलाइन २०७२ पुष २६ गते १६:११ मा प्रकाशित

aliyan copyभक्तपुर । सञ्चारकर्मी तथा स्रष्टा जितेन्द्र रसिकको तेस्रो कृति ‘एलियनको पृथ्वी भ्रमण’ शनिबार सार्वजनिक गरिएको छ । भक्तपुर साहित्यिक समाजको स्थापना दिवसका अवसरमा प्रा डा देवी सुवेदीले उक्त कृति लोकार्पण गर्दै सचित्र कथा पढेर बालबालिकाले मनोरञ्जन र ज्ञान हासिल गर्न सक्ने प्रतिक्रिया दिएका छन् ।

स्वदेश प्रकाशन प्रालिले प्रकाशन गरेको बाल कथासंग्रहभित्र ‘पेन्सिलको अदालत’, ‘क्यामेराको झगडा’, ‘काग र कोइलीको बिहे’, ‘एलियनको पृथ्वी भ्रमण’, ‘टाइक्यापे खैरे’, ‘लाँकुरी र काजी’ शीर्षकमा छ कथा सङ्ग्रहित छन् । कथाकार रसिकले बालबालिका मुछिएका माटो र स्रष्टा कलाकार हुन् भन्दै मुछिएका माटालाई कलाको स्वरूप दिने र देशको बगैँंचा सिगार्ने काम स्रष्टाबाट हुनुपर्ने बताए ।

बाल कथाकार तथा समालोचक कार्तिकेय घिमिरेले कृतिको समीक्षा गर्दै कृतिका सबै कथा अब्बल रहेको र बालबालिकाको मन छुन सक्ने विचार राखेका थिए । समाजका अध्यक्ष राजुराम मुनकर्मीले कृति बालबालिकाका लागि समय परिवेशअनुसारको खुराक भएको दाबी गरेका छन् । समाजसेवी कृष्णलाल प्रधानलाई समाजको मानार्थ सदस्यता प्रदान गरिएको थियो ।

समाजको ५२ औँ नियमित साहित्यिक श्रृंखलामा काभ्रेको जुनकिरी साहित्य अभियान, ज्योतिष्मति साहित्य समाज, ज्योति साहित्य समाज, सामाखुसी साहित्य समाज, तरेली साहित्य प्रतिष्ठान लगायत दर्जनभन्दा बढी साहित्य संस्था सहभागी थिए । सहभागी कविले आआफ्नो रचना सुनाएका थिए । (सौस)

प्रतिक्रिया

पछिल्ला अपडेट्स

लोकप्रिय