खेल-खेलाडी

पाठकको संयोजकत्वमा छानविन समिति

सौर्य अनलाइन २०७२ मंसिर ११ गते १२:३२ मा प्रकाशित

news__1काठमाडौं, १० मंसिर । राष्ट्रिय खेलकुद परिषद् (राखेप) ले अखिल नेपाल फुटबल संघ (एन्फा) को पछिल्लो घटनाक्रमका सम्बन्धमा विभिन्न ४ बुँदामा छानविन गर्न पूर्वसचिव प्रतापकुमार पाठकको संयोजकत्वमा बिहीबार ५ सदस्यीय छानविन समिति गठन गरेको छ ।

राखेप सदस्य सचिव केशवकुमार विष्टले समितिका पाँचै सदस्यको उपस्थितिमा ‘अखिल नेपाल फुटबल संघका सम्बन्धमा छानविन तथा सुझाव समिति’ गठनको औपचारिक घोषणा गरे । परिषद्को बिहीबारकै सदस्य–सचिवस्तरीय निर्णयानुसार समिति गठन गरिएको राखेपका प्रेस सल्लाहकार रोहित दाहालले जानकारी गराए । पाठकको संयोजकत्वमा गठित समितिका सदस्यहरुमा महालेखा परीक्षकको कार्यालयका पूर्वनिर्देशक उमेशप्रसाद ढकाल, कानून विज्ञ प्रवल शर्मा तथा युवा तथा खेलकुद मन्त्रालयका उपसचिव रामबहादुर हमाल रहेका छन् । सचिवमा राखेपअन्तर्गत खेलकुद विकास विभागका प्रमुख कूलबहादुर थापा छन् । नेपाली फुटबलको पछिल्लो अवस्थाबारे जानकारी लिन मलेसियाबाट नेपाल आएका एएफसीका अन्तर्राष्ट्रिय सम्बन्ध अधिकृत पुरुषोत्तम कट्टेल, युवा तथा खेलकुद मन्त्री सत्यनारायण मण्डल तथा एन्फा महासचिव धिरेन्द्र प्रधानसँग सोमबार युवा तथा खेलकुद मन्त्रालयमा भएको भेटमा सदस्य–सचिव विष्टले एन्फाका सम्बन्धमा छानविन गर्न समिति गठनको प्रस्ताव गरेका थिए । त्यो प्रस्तावलाई सबैले समर्थन जनाएका थिए ।

समितिलाई छानविन गर्न दिइएको विषयमा अन्तर्राष्ट्रिय फुटबल महासंघ (फिफा) ले एन्फा अध्यक्ष गणेश थापालाई गरेको कार्वाही र सोबाट परेको प्रभाव तथा एन्फाको कार्यकारी समितिले गरेको निर्णय र अध्यक्ष थापाले गरेको निर्णयको बैधानिकता सम्बन्धमा रहेका छन् । तेश्रो विषयमा म्याच फिक्सिङ प्रकरण र यु–१६ टिमलाई गरेको कार्वाही र सो विषयमा एन्फाको भूमिका सम्बन्धमा रहेका छ । चौथो तथा अन्तिम विषयमा एन्फामा भएको आर्थिक अनियमिता, एन्फाको काम कार्वाहीहरु विधि विधानसम्मत गर्न तथा एकताबद्ध बनाइ फुटबलको विकास र विस्तार गर्न के गर्नु पर्दछ ? भन्नेमा केन्द्रित छ । समितिलाई उक्त विषयमा छानविन गरी सत्यतथ्यसहितको प्रतिवेदन र सुधारका लागि सुझाव परिषद्समक्ष पेश गर्न १ महिनाको समय दिइएको प्रेस सल्लाहकार दाहालले जनाएका छन् । समिति घोणषापछि सदस्य सचिव विष्टले सम्बन्धितलाई पत्र हस्तान्तरण गरेका थिए ।

प्रतिक्रिया

पछिल्ला अपडेट्स

लोकप्रिय