अपडेट नै हुँदैन प्राधिकरणको वेभसाइट

काठमाडौं, २ वैशाख । नेपाल विद्युत् प्राधिकरण सञ्चालक समितिको अध्यक्षबाट मुख्यसचिव राजीनामा दिएको तीन साता नाघिसक्दा पनि वेभसाइट भने अपडेट भएको छैन ।

५ चैतमा नयाँ सरकार आएपछि उनले ६ चैत्रमा बसेको प्राधिकरण सञ्चालक समितिको बैठकमा राजीनामा दिने संकेत गरेका थिए र त्यसको लगत्तै राजीनामा दिएका थिए । १७ चैत्रमा बसेको मन्त्रिपरिषद्को बैठकले राजीनामा पनि स्वीकृत गर्‍यो तर प्राधिकरणको आधिकारिक वेभसाइट डब्लुडब्लुडब्लु.एनइए.ओआरजी.एनपीमा हालसम्म उनी नै अध्यक्ष छन् ।
त्यति मात्र होइन, २९ चैतमा पुराना प्राधिकरणको सञ्चालक समितिका सदस्यहरू हटाएर चार नयाँ सञ्चालक सदस्यहरू नियुक्त गरियो । धनुषाका मनोजकुमार मिश्र, बुटबलका सन्तोषकुमार श्रेष्ठ, काठमाडौंमा लक्ष्मणप्रसाद अग्रवाल र राजविराजका विवेक तातेड प्राधिकरणको नयाँ सञ्चालक सदस्य नियुक्त भए तर प्राधिकरणको वेभसाइटमा अझै पुरानै सञ्चालकहरू विश्वप्रकाश गौतम, मोहनराज पन्त, डा. डम्बबहादुर नेपाली र टेकनाथ आचार्यको तस्बिर छ । ऊर्जा मन्त्रालयले नयाँ सदस्यहरू नियुक्त गरेपछि पुराना सञ्चालकहरूलाई प्राधिकरणकै कर्मचारीमार्फत अवकाशपत्र थमाइएको थियो । नयाँ सञ्चालकबारे जानकार प्राधिकरणले अझै वेभसाइट परिवर्तन गरेको छैन । प्राधिकरणभित्र कहिल्यै लोडसेडिङ हुँदैन र इन्टरनेटको अभाव पनि छैन, अपडेट गर्नका लागि निकाय पनि छ तर अपडेट छैन । ‘मुख्यसचिवको राजीनामा स्वीकृत नै भएको दुई साता बितिसकेको छ, अध्यक्ष मन्त्री हो कि होइन भन्ने विश्वस्त नभएको भए अध्यक्षमा खाली राख्न सकिन्थ्यो, नयाँ सञ्चालकहरूको फोटो नआएको भए पनि खाली राख्न सकिन्थ्यो,’ प्राधिकरणका एक उच्च अधिकारीले भने, ‘अपडेट नहुँदा प्राधिकरणको वेभसाइट हेरेर प्राधिकरणबारे जानकारी लिनेले गलत सूचना लिइरहेका छन् । तर, प्राधिकरणका कार्यकारी निर्देशक रामेश्वर यादवले मुख्यसचिवको राजीनामा स्वीकृतबारे मन्त्रिपरिषद्बाट कुनै पत्र नआएकाले परिवर्तन नगरिएको र सञ्चालकहरूको हकमा नयाँ सञ्चालक नियुक्त भएको लगत्तै विदा परेकाले अपडेट गर्न नसकिएको बताए ।
प्राधिकरणले नयाँ जानकारी दिनका लागि वेभसाइटमा राखेको प्रेस रिलिजमा २०६८ साल भदौ २८ गतेपछि कुनै अपडेट गरेको देखिँदैन तर वेभसाईटभित्र नै लेटेस्ट अपडेट भन्दै २०६९ फागुन ३० गतेसम्मको अपडेट भने गरिएको छ । ‘प्रत्येक दिन प्राधिकरणले केही न केही नयाँ कार्यहरू गरिएको हुन्छ, त्यो विवरण वेभसाइटमा राखिदिएमा इन्टरनेटको पहुँच भएका नेपालीले प्राधिकरणको गतिविधि सजिलै थाहा पाउने सक्थे,’ प्राधिकरणका ती अधिकारीले भने, ‘लोडसेडिङको समस्या नभएको प्राधिकरणमा वेभसाइट अपडेट नहुँदा धेरैले गुनासो पनि गर्ने गरेका छन् ।’ प्राधिकरणमा आफ्ना नयाँ सूचना, जानकारी दिनका लागि छुट्टै व्यवस्थापन सूचना महाशाखा पनि छ तर दिनदिनै गर्नुपर्ने अपडेट गरिएको छैन । प्राधिकरण सञ्चालक समितिको निर्णयहरू समेत वेभसाइटमा राख्नुपर्ने भए पनि राख्ने गरेको छैन । प्राधिकरणले निर्णय गरेको २४ घन्टाभित्र सार्वजनिक गर्नुपर्ने भए पनि नगरेकाले ती निर्णयहरू वेभसाइटमा राख्नका लागि जलस्रोतका सरोकारवालाहरूले माग गर्दै आएका छन् तर हालसम्म अपडेट गरेको छैन । नेपालको जलविद्युत् तथा प्राधिकरणबारे स्वदेश तथा विदेशबाट जानकारी लिनका लागि वेभसाइटको प्रयोग गर्ने हुँदा अपडेट नगराएमा गलत सूचना प्रवाह हुने भएकोले समयमै गर्नुपर्ने आवश्यकता छ ।
सरकारले ऊर्जा मन्त्री, राज्यमन्त्री वा सरकारले तोकेको व्यक्तिलाई प्राधिकरणको अध्यक्ष तोक्ने गरेको छ । तत्कालीन डा. बाबुराम भट्टराईको पालामा मुख्यसचिव पौडेललाई तोकिएको थियो । उनले राजीनामा दिएपछि अहिले स्वत: ऊर्जा मन्त्री उमाकान्त झा अध्यक्ष बनेका छन् । चार मनोनीत सञ्चालक सदस्यबाहेक अर्थसचिव र ऊर्जासचिव प्राधिकरण सञ्चालक समितिका सदस्य हुने गरेका छन् । ६ चैतमा प्राधिकरणको बैठक बसेपछि अहिलेसम्म सञ्चालक समितिको बैठक बस्न सकेको छैन ।