नियन्त्रणको जिम्मेवारी पाएका व्यक्ति विदेशमा मस्त

काठमाडौँ, २७ साउन । वर्षातसँगै देशभरका अधिकांश जिल्लामा हैजा र झाडापखालाका बिरामीको संख्यामा वृद्धि भइरहेको छ । केही जिल्लामा त हैजा र झाडाको प्रकोपका कारण मृत्युसमेत भइरहेको छ । रोगको प्रकोप फैलिरहेको यस्तो बेला नियन्त्रणको जिम्मेवारी पाएको निकायका प्रमुख भने विदेश सयरमा मस्त छन् ।
हैजाका कारण डोटीमा १२ जनाभन्दा बढीको मृत्यु भइसकेको छ भने नुवाकोट, गोरखालगायत जिल्लामा झाडापखलाका कारण बिरामी परेका व्यक्ति सिकिस्त बनिरहेका छन् । यस्तो अवस्थामा रोग नियन्त्रण गर्ने केन्द्रीय निकाय इपिडिमियोलोजी तथा रोग नियन्त्रण महाशाखाका प्रमुख डा. जिडी ठाकुर भने स्विट्जरल्यान्डको जेनेभा गएका छन् ।
रोगको महामारी फैलिरहेको यो समयमा विदेश गएको खबर बाहिर आउने डरले स्वास्थ्य सेवा विभागका महानिर्देशकलाई समेत झुक्याएर निर्देशक डा. ठाकुर विदेश गएका हुन् । विभागका महानिर्देशक डा. मिङ्मार गेलजेन शेर्पाले डा. ठाकुरले दुई/चार दिन बिदामा बसेको बताए ।
‘उहाँले बिदा चाहियो भन्नुभएको थियो, त्यही भएर मैले बिदा मात्र दिएको छु,’ महानिर्देशक शेर्पाले भने, ‘तर अहिले मैले उहाँ विदेश गएको खबर सुनिरहेको छु । उहाँ कुन देशमा के कामले जानुभएको भन्ने मलाई थाहा छैन ।’
स्वास्थ्य मन्त्रालय स्रोतका अनुसार डा. ठाकुर हेल्थ रिभ्यु कार्यक्रममा भाग लिन जेनेभा गएका हुन् । जेनेभामा भइरहेको सो कार्यक्रममा मन्त्रालयका सचिव र चिकित्सा महाशाखा प्रमुखका लागि कोटा आएको थियो । तर, मन्त्री राजेन्द्र महतोको सहयोगमा सो कोटा आफूलाई पारी उनी विदेश उडेको स्रोतको दाबी छ ।
‘चिकित्सा महाशाखा प्रमुखलाई सचिवको अनुपस्थितिमा निमित्त सचिवको जिम्मेवारी दिनुपर्ने भएकाले उहाँको कोटा खाली भएको थियो,’ स्रोतले भन्यो, ‘उहाँको स्थानमा विभागका अरू जुन निर्देशक पनि गए हुने भन्ने थियो तर डा. ठाकुरले कुरा मिलाएर जानुभएछ ।’
मन्त्रालयका अनुसार २२ गते जेनेभा गएका डा. ठाकुर आगामी आइतबार फर्किने कार्यक्रम छ । विभागमा खबरै नगरी गएका उनले आºनो महाशाखामा निमित्तको जिम्मेवारीसमेत कसैलाई दिएका छैनन् ।
‘बिदामा बसेको समयमा अन्य कर्मचारीलाई निमित्तको जिम्मेवारी दिएको भए जिल्लामा औषधि तथा कर्मचारीको अवस्थाअनुसार काम गर्न सहज हुने थियो,’ एक कर्मचारीले भने, ‘तर, डा. ठाकुरले कसैलाई पनि जिम्मेवारी नदिई गएकाले महाशाखाका कर्मचारी कहाँ के गर्ने भन्ने अन्योलमा छन् ।’
उनी ०६६ मा जाजरकोटलगायत मध्यपश्चिमाञ्चल क्षेत्रका जिल्लामा फैलिएको हैजा र झाडापखालाको समयमा पनि विदेश सयरमा थिए । मन्त्रालयले वर्षातको मौसममा एकैसाथ देशभर विभिन्न सरुवा रोगको महामारी फैलने भएकाले यो समयलाई सरुवा रोगको महामारी तथा प्रकोप फैलने मौसमका रूपमा लिएको छ । मन्त्रालयले जिल्लाका कर्मचारीलाई वर्षातको समयमा बिदा नबस्न निर्देशनसमेत दिइसकेको छ ।