बन्दले ५० प्रतिशत पर्यटक फिर्ता

काठमाडौं, ११ जेठ । लगातार बन्द–हडतालका कारण नेपाल घुम्न आएका आधाजसो पर्यटक स्वदेश फर्किएको पर्यटन व्यवसायीले दाबी गरेका छन् । असुरक्षाको महसुस गरेर पर्यटक फर्किन थालेको उनीहरूको दाबी छ ।

ट्राभल एजेन्सी सञ्चालकहरूको छाता संगठन नेपाल एसोसिएसन अफ टुर एन्ड ट्राभल एजेन्ट्स (नाट्टा) ले बन्द–हडतालका कारण पर्यटन उद्योगमा गम्भीर प्रभाव पारेको बताएको छ । विज्ञप्ति जारी गर्दै नाट्टाले एक महिनाभित्र नेपाल भ्रमणमा आएका ६० प्रतिशतभन्दा बढी पर्यटक भ्रमणअवधि नसकिँदै स्वदेश फर्केको जनाएको छ ।
‘विभिन्न मुलुकले नेपाल भ्रमणमा जाँदा आफ्ना नागरिकलाई सचेत हुन आग्रह गर्दै ट्राभल एडभाइजरी जारी गरेका छन् । जसका कारण नेपाल आउन चाहने ५० प्रतिशतभन्दा बढी सम्भावित पर्यटकले नेपाल भ्रमण रद्द गरेका छन्,’ नाट्टाको विज्ञप्तिमा उल्लेख छ । बन्द–हडतालको श्रृंखला बढेपछि गत साता अस्ट्ेरलिया सरकारले नेपालमा उच्च सतर्कता अपनाउन आफ्ना नागरिकलाई आग्रह गरेको थियो ।
बन्द–हडतालजस्ता गतिविधिबाट पर्यटन उद्योगमा नकारात्मक असर परेको र मुलुककै अर्थतन्त्रमा पनि दूरगामी असर पर्ने दाबी नाट्टाको छ । लगातारको बन्द–हडतालप्रति सरकारले मौनता अपनाउनु अकर्मण्यताको पराकाष्ठा भएको उसको भनाइ छ ।
बन्द–हडतालले आर्थिक मेरुदण्डका रूपमा रहेको पर्यटन उद्योगले ठूलो क्षति व्यहोर्नुपरेको र पुन: सामान्य अवस्थामा आउन वर्षाँै लाग्नसक्ने दाबी पर्यटन व्यवसायीले गरेका छन् । एक दिन मुलुक बन्द हुँदा एक वर्षसम्म त्यसको असर पर्यटन बजारमा पर्ने भएकाले सन् ०१३ नेपाली पर्यटन क्षेत्र धराशयी हुनसक्ने उनीहरूको भनाइ छ ।
नेपाल एसोसिएसन अफ टुर अपरेटर्स (नाटो) ले पनि बन्द–हडतालका कारण पर्यटकीय गतिविधिमा असर परेको भन्दै बन्द फिर्ता लिन आग्रह गरेको छ । सगरमाथा आरोहणको मुख्य सिजनका कारण अन्तर्राष्ट्रिय क्षेत्रमा नेपालबारेमा सकारात्मक सन्देश गइरहेका बेला बन्द–हडतालका कारण विदेशमा नेपालको छवि नकारात्मक प्रचार भएको उसको भनाइ छ । ‘राजनीतिक आन्दोलनका कारण विभिन्न गन्तव्यमा जाने पर्यटकलाई समस्या परेको छ,’ नाटोको विज्ञप्तिमा उल्लेख छ ।
देशका विभिन्न भागमा पर्यटक सवारीसाधनमा भएको अवरोधप्रति नाटोले गम्भीर आपत्ति जनाएको छ । साथै पर्यटकको सुरक्षाका लागि सरकारसँग आग्रहसमेत गरेको छ ।