खोजखबर

‘दैनिक सातजना आउँथे’

सौर्य अनलाइन २०६९ जेठ ७ गते १:४९ मा प्रकाशित

हेटौंडा, ७ जेठ । ‘ग्राहक खुसी भएनन् भने चुरोटले पोल्थे,’ १५ वर्ष भारत मुम्बईको कोठीमा नारकीय जीवन बिताएकी मकवानपुर राक्सिराङ–८ की बिन्दिया तामाङ (नाम परिवर्तन) ले भनिन्, ‘दैनिक सातजनासम्म आउँथे र सबैलाई खुसी पार्नै पथ्र्यो ।’

तामाङ आफ्नै पतिबाट भारत मुम्बईको कोठीमा बेचिएकी अभागी महिला हुन् । १५ वर्ष कोठीमा नारकीय जीवन बिताएकी तामाङ तरकारी किन्ने बहानामा बजार निस्केर केही नेपाली महिलाको सहारामा नेपाल फर्कन सफल भएकी हुन् । २१ चैतमा नेपाल फर्किएकी तामाङले आफूलाई वेश्यालयमा पुर्‍याउने पति र दुई मतियारलाई पक्राउन सफल भएकी छिन् ।
पश्चिम मकवानपुरको राक्सिराङ गाउँ । गरिबी र अभावका बीच चढ्दो उमेरसँगै पलाएका अनेक सपनामा बहकिएर तामाङ ०४५ सालमा काठमाडौंमा गलैँचा बुन्न पुगेकी थिइन् । उनलाई मनहरी– ३ का सीताराम थिङले गलैँचामा काम दिएका थिए भने विवाह गरेको भनेर सँगै पाँच महिना राखेका थिए ।
उनी सम्झन्छिन्, ‘गलैँचामा ल्याएर काममात्र दिएनन्, विवाह गरेको भनेर पाँच महिना सँगै राखेपछि एउटी नारीलाई अरु के सुख चाहियो र ?’ तर उनै पतिले भारत बनारसमा काम गर्न जाउँ भन्दै अरु चारसहित उनलाई पनि गोरखपुर हुँदै मुम्बइ पुर्‍याए वेश्यालयमा बेचेका थिए ।
‘सत्य भन्ने शशिकुमार तितुङ् र श्याम बम्जनले बनारसमा काम खोजेको भन्दै ढाँटेर हामीलाई मुम्बइ पुर्‍याइयो,’ तामाङले भनिन्, ‘त्यतिखेर म गर्भवती भइसकेको थिएँ ।’ मुम्बई पुर्‍याएपछि श्याम लामाले होटलमा लगेको उनले प्रहरीलाई बताएकी छिन् । ‘नेपाली मूलका शिला र बिमला नामका केटीहरूसँग हामीलाई छाडेर पति, सत्य र श्यामले बजार घुम्न जाने भनेर निस्किएको उनले बताइन् । ‘हामी त कोठीमा ५० हजार रुपियाँमा बेचिएछौँ,’ उनले सुनाइन् ।
‘रत्ननगर नगरपालिका–१३ जयमंगलामा बसोबास गरिरहेका पति सीताराम तामाङलाई खोजेर उनले पक्राउ गराएकी छिन् । उनले सत्य भनिने शशिकुमार र श्याम पदमपोखरीमा रहेको थाहा पाएपछि प्रहरीमा उजुरी दिएकी छन् । उजुरीका आधारमा प्रहरीले तीनैलाई पक्राउ गरेर मानव बेचविखनविरुद्धको मुद्दा चलाएको छ । ‘नेपाल फर्किन पाएँ,’ उनले भनिन्, ‘पत्नी बनाएर वेश्यालयमा बेच्ने पतिलाई पक्राउ गराउँन सकेँ, १५ वर्ष मैले पाएको पीडा भुल्न नसकेपछि उनीहरू भाग्न पाएनन्, यसैमा खुसी छु ।’

प्रतिक्रिया

पछिल्ला अपडेट्स

लोकप्रिय