चित्रा अब प्राइम भिडिओमा

काठमाडौँ । घनश्याम लामिछानेको निर्देशनमा बनेको फिल्म ‘चित्रा’ प्राइम भिडिओ (अमेजन प्राइम भिडिओ) मा स्ट्रिमिङ भएको छ । २०८० सालको २७ पुसमा नेपालमा रिलिज भएको यो फिल्म अब विश्वभरका दर्शकले हेर्न सक्ने छन् ।

अमेजन प्राइम सदस्यता भएका दर्शकले जुनसुकै देशबाट पनि यो चलचित्र हेर्न सक्नेछन् । जस अन्तर्गत २०० भन्दा बढी देशका दर्शकले यो सिनेमा हेर्न पाउने भएका छन् ।

चलचित्रको हिन्दी डब संस्करणलाई ‘रिलिज वर्ड’ ले अन्तर्राष्ट्रिय डिजिटल वितरण गरेको हो । विशेष कुरा के छ भने यो चलचित्र ४३ भाषामा सबटाइटलसहित रिलिज गरिएको छ, जसले यसलाई बहुभाषी दर्शकको पहुँचमा पु¥याएको छ । निर्माण पक्षका अनुसार ‘चित्रा’ विश्वव्यापी रूपमा अमेजन प्राइममा रिलिज हुने पहिलो नेपाली चलचित्र हो । यसअघि केही नेपाली चलचित्रहरू अमेजन प्राइम युके वा युएसए संस्करणमा मात्र सीमित थिए, तर ‘चित्रा’ भने ग्लोबल प्लेटफर्ममा रिलिज भएको हो ।

निर्देशक लामिछानेले आफूले निर्देशन गरेको फिल्म यसरी विश्वव्यापी रूपमा रिलिज भएको खबरले अत्यन्त उत्साहित बनाएको बताए ।
लामिछाने भन्छन्, ‘चित्राको यो सफलता नेपाली चलचित्र उद्योगका लागि उदाहरणीय बन्न सक्ने सम्भावना छ । विश्व बजारमा नेपाली कथालाई पु¥याउने र नेपालमा पनि यस्तो स्तरको सिनेमा बन्न सक्छु भन्ने सन्देश दिनुमा फिल्म सफल भएको देखिन्छ । हाम्रो कथा अब संसारका दर्शकले बुझ्ने भाषा र माध्यममा पुगेको छ । यो एउटा सुरुआत मात्र हो ।’

यस फिल्ममा सन्तोष अधिकारी, मेनुका प्रधान, शुभेच्छा खड्का, अर्पण थापा, प्रमोद अग्रहरी, अन्जना बराइली, सिम्रन खड्का, आयुशी ढकाल, विनोद पौडेल, कपिल शर्मा, कुमार गुरुङ, उज्ज्वल ढकाल, दिपेश गजुरेल र प्रकाश घिमिरेलगायत कलाकारहरूको अभिनय रहेको छ ।

अजय अधिकारीको कथा र मनिष गौतमको पटकथा रहेको यो चलचित्रले एक रिटायर्ड बाबु र छोरीबीचको सम्बन्ध, भावनात्मक उतारचढाव र पारिवारिक सम्वन्धको कथा समेटिएको छ । महेश पौडेलको छायांकन रहेको चलचित्रमा बनिश शाह र सन्देश शाहको संयुक्त सम्पादन रहेको छ ।