प्रधानमन्त्री स्वरोजगार कार्यक्रममा काम गर्नेले खातामा आएको रकम पाए

रौतहट । रौतहटको बौद्धिमाइ नगरपालिका–३ मटीअर्बामा प्रधानमन्त्री स्वरोजगार कार्यक्रमअन्तर्गत काम गरेका श्रमिकहरुले खातामा आएका अनुसारको रकम पाएका छन् । गरिब, विपन्न परिवारका व्यक्तिलाई १०० दिने रोजगारी दिने उदेश्यले सञ्चालन भएको प्रधानमन्त्री स्वरोजगार कार्यक्रमअन्तर्गत ५६ दिन काम गरेबापतको रकम ३६ हजार ३ सय रुपैयाँ बुझेको काम गरेका स्थानीय मेघु राउत कुर्मीले बताए ।

नगरपालिकाले दिएको ७ जनाको रोजगारीमा खटेका स्थानीय नथुनी महतो, जैतुन खातुन, माया देवी, अरुणकुमार गुप्ता, सोनेलाल बैठा र रिना कुमारी कुशवाहाले काम गरेबापतको खातामा आएका रकम ३६ हजार ३ सय बुझी लिएको बताएका छन् । वडाध्यक्ष मनिभुषण साहले परिश्रमको रकमबाट कमिसन लिएको भनि सामाजिक सञ्जालमा दिएको अभिव्यक्ति आक्रोसको उपज रहेको उनीहरुले बताएका छन् ।

आफूहरू आक्रोसित भएर वडाध्यक्ष साहमाथि गलत टिप्पणी गरेको भने काम गरेको दिनको बैंकमार्फत आएको रकम वडाध्यक्षमार्फत लिइसकेको सोनेलाल बैठाले बताए । वडाध्यक्ष साहले नगरप्रमुख प्रदीप यादवले ७ जनालाई मात्र राख्ने गरी दिएको कोटा अनुसार ७ जनालाई रोजगारी दिएको र उनीहरुले कामसमेत गरेको बताए ।

नेपाल सरकारले निर्धारण गरेको मापदण्ड अनुसार दैनिक रुपमा पाउनुपर्ने ज्यालादारी अनुसारको रकम काम गर्ने व्यक्तिको खातामा नै गएको र सो अनुसारको रकम पाइसकेको उनले प्रस्ट पारे ।

राजनीतिक प्रतिसोध साध्नका लागि विपक्षीहरू आफूविरुद्ध उचालेर गलत आरोप लगाउने कार्य गरेको उनले दाबी गरेका छन् । बौद्धिमाई नगरपालिका– ४ मा काम नगराई कागजमै आफ्नो नजिकको व्यक्तिलाई नाम लेखी वडाध्यक्ष तुरुन्त नारायण यादवले रकम अनियमितता गरेको स्थानीयहरुले बताएका छन् ।

राकेश यादव

रौतहट