सिन्धुपाल्चोकको सात गाविसमा थप ६२ को मृत्यु

मेलम्ची, १६ वैशाख । शनिबार गएको विनाशकारी भूकम्पबाट सिन्धुपाल्चोकमा जनधनको ठूलो क्षति भएको छ ।

सिन्धुपाल्चोक २ नं क्षेत्रको सात गाविसमा मात्र थप ६२ जनाको शव निकालिएको छ भने २५० थप घाइते भएका छन् ।

गत वैशाख १२ गते आएको भूकम्पमा परी मंगलबारसम्म मात्र ४१८ जनाको शव फेला परेको थियो भने ३५० घाइते भएका थिए ।

इलाका प्रहरी कार्यालय नवलपुरका प्रहरी निरीक्षक प्रह्लाद अधिकारीका अनुसार मृतकको सङ्ख्या अझै बढ्न सक्ने देखिएको छ ।

सिम्पालकाभ्रे गाविसका केही वडा अझै पनि सम्पर्कविहीन छन् । बाटो भत्किएर उद्धारको लागि गएको प्रहरी टोली पनि बीचबाटोमै अलपत्र छन् ।

सिम्पालकाभ्रेमा अझै १६ जना गम्भीर घाइतेको उद्धार गर्न सकिएको छैन । नवलपुर बजारमा रहेका नौ घाइतेको उद्धार गर्न कठिनाइ भइरहेको छ ।

प्रहरी निरीक्षक अधिकारीले भने, ‘नवलपुरमा एकवटा एम्बुलेन्स छ । केही ठाँउमा पहिरोका कारण सडक अवरुद्घ भएकाले भएको एम्बुलेन्स प्रयोगमा ल्याउन सकिएको छैन । स्काभेटरले केहीबेरमा सडक सफा गर्न सक्ने भएपनि स्काभेटर उपलब्ध नहुँदा थप घाइतेको उपचारको लागि समस्या भएको छ ।’

स्काभेटरको लागि दुई दिन अघिदेखि आग्रह गर्दापनि अहिलेसम्म उपलब्ध भएको छैन ।

स्थानीयले छिटो सडक सुचारु गरी घाइतेको उपचार गर्न माग गरेका छन् । खुल्ला आकाशमुनि बसेका भूकम्पपीडितले औषधि, पाल र खाद्यान्नको माग गरेका छन् ।