वालीमा विषादी प्रयोगले सारसको संख्या बर्सेनि घट्दो

कन्चनपुर । कन्चनपुर–कैलालीमा सारस चराको संख्या बर्सेनि घट्दो क्रममा रहेको छ । सिमसार क्षेत्रमा देखापर्ने सारस पछिल्ला दिनहरूमा देख्नै मुस्किल हुन थालेको छ ।

सिमसार क्षेत्र मासेर खेती गरिन थालेपछि सारसको बासस्थान खुम्चिँदै जान थालेको छ । त्यसले यो चरालाई आहाराको अभाव भएको छ । नेपाल पक्षी संरक्षण संघका चराविज्ञ हिरूलाल डगौराका अनुसार खेतीका लागि किसानले रासायनिक मलसँगै कीटनाशकको अत्यधिक प्रयोग गर्न थालेपछि यो चराको अस्तित्व नै संकटमा परेको छ । सारसको सिकार गर्ने, अण्डा चोरी गर्ने कार्यसँगै जलवायु परिवर्तन, वातावरण प्रदूषणलगायतले थप जोखिम सृजना गरेको छ ।

चराविज्ञ डगौराले कैलालीमा ५ र कन्चनपुरमा २२ वटासम्म सारस अभिलेख गरेका छन् । त्यो संख्या पछिल्ला वर्षहरूमा घट्दै गएको छ । कन्चनपुरमा हाल करिब १० देखि १५ वटा सारस मात्र रहेको उनको अनुमान छ ।

अग्लो खुट्टा र लामो घाँटी हुने सारसको शरीर सेतो, घाँटी खैरो र टाउको रातो हुने गर्दछ । सारसको उचाइ ५ देखि ६ फिटसम्म हुने गर्दछ भने तौल ६ देखि १२ किलोसम्म हुन्छ । जीवनभर एउटै जोडीमा रहने सारसको विशेषता नै हो ।

शुक्लाफाँटा राष्ट्रिय निकुञ्जको कालिकिच ताल, बेलडाँडी गाउँपालिकाको सिमसार क्षेत्रमा सारस देखापर्ने गरेका छन् । यहाँ कहिलेकाहीँ बर्सात्का बेला अन्य क्षेत्रका धान खेत तथा कैलालीको घोडाघोडी रामसार क्षेत्रमा आहारा खोज्दै गरेको अवस्थामा सारस देखापर्ने गरेका छन् ।

‘कीरा, फट्याङ्ग्रासँगै सारसले आहाराका रूपमा शंखेकीरा, सर्पलगायत खाने गर्दछ’, चराविज्ञ डगौरा भन्छन्, ‘बालीनालीका लागि हानिकारक मानिएका कीराहरू सारसले खाने भएकाले यसलाई कृषकको सहयोगी चराका रूपमा यसलाई लिन सकिन्छ । कीरा–फट्याङ्ग्रा नियन्त्रण हँुदा किसानले अन्नको उत्पादन बढी लिन सक्छन् तर पछिल्लो समय यो चरा आफैँ संकटमा परेको देखियो ।’

हिंस्रक जनावर बाघ, चितुवा, स्याल, ब्वाँसोलगायत नजिक आउन थाले यस चराले ठूलो आवाजले कराएर जानकारी दिने गर्दछ । त्यसैले सारसलाई मानवमैत्री चराका रूपमा समेत लिने गरिन्छ । आहारा र गुँड बनाउनका लागि यो चरा धानखेत र सिमसारमा निर्भर हुने गरेको चराविज्ञ डगौरा बताउँछन् । ‘तर पछिल्लो समय यहाँ मुस्किलले यो चरा देख्न पाइन्छ । यसर्थ सिमसार क्षेत्र जोगाउनका लागि पालिका र स्थानीय समुदायले विशेष ध्यान दिन आवश्यक छ । यस चराको महत्वसँगै आनीबानी, व्यवहार र बासस्थानबारे जनचेतना जगाई स्थानीय बासिन्दालाई संरक्षणको क्षेत्रमा सहभागी गराउनुपर्छ’, उनले भने ।

कृषिमा रासायनिक मल र विषादीको प्रयोगलाई निरुत्साहित गर्दै जैविक मल र जैविक विषादीको प्रयोगलाई बढावा दिन किसानलाई उत्प्रेरित गराउन आवश्यक रहेको जानकारहरू बताउँछन् । ‘दुई दशक अघिसम्म सारस चरा सहजै रूपमा धानका खेतमा आहारा खोज्दै गरेको अवस्थामा देखिने गरेका थिए, हिउँदमा मटरका दाना खान खेतमा आउँथे’, शुक्लाफाँटा नगरपालिका–३ का थारू अगुवा दानसिंह दहित भन्छन्, ‘रासायनिक मल र विषादीको प्रयोगमा व्यापकता आएपछि सारस देखिन छाडेका छन्, फाटफुट रूपमा पनि अरू चराजस्तो देखिएका छैनन् ।’

सारसलाई राष्ट्रिय निकुञ्ज तथा वन्यजन्तु संरक्षण ऐन २०२९ अनुसार संरक्षित पक्षीका रूपमा राखिएको छ भने अन्तर्राष्ट्रिय प्रकृति संरक्षण संघ (आइयुसिएन)ले यसलाई संवेदनशील चराको सूचीमा राखेको छ । तथ्यांकअनुसार रूपन्देही, कपिलवस्तु र नवलपरासीमा मात्रै सारसको संख्या ६०० भन्दा केही बढी रहेको छ । दक्षिण एसियामा भने यो चराको संख्या १० हजार जति रहेको अनुमान गरिएको छ ।