दुई दशकदेखिको विवाद दुई दिनमै मिलापत्र

कञ्चनपुर । दुई दशकदेखिको जग्गा अंशसम्बन्धीको विवाद दुई दिनमै मिलापत्र भएपछि शुक्लाफाँटा नगरपालिका–१२, देखतभूली अग्लीपट्टीका इतवरीया राना निकै खुसी भएका छन् । नगरपालिकाको न्यायिक समितिले उनको उजुरी आएको दुई दिनममै अंश पाउने गरी विवादको टुङ्गो लगाइदिएको थियो ।

झन्डै तीस वर्षअघि राना परिवार बस्दै आएको दुई बिघा दर्ता भएको जग्गा र तीन बिघा ऐलानी जग्गा दोदा नदीले कटान गरी बगाएको थियो । ‘जग्गा कटान भएको दुई दशकपछि नदीले बहाव परिवर्तन गर्दै जग्गा भएर बग्न छाडेपछि चार जना बुवाको अंश लाग्ने जग्गामा तीन जना बुवाका छोराहरूले खेती गर्न थालेका थिए,’ रानाले भने, ‘मैले अंश माग्न खोज्दा गालीगलौज र कुटपिट गर्न आउन थाले, त्यसपछि अंशकै लागि नगरपालिकाको न्यायिक समितिलाई गुहारेँ ।’

दुवै पक्षलाईसँगै राखेर न्यायिक समितिको इजलासमा छलफल बहस भयो । विगतका कटुतालाई बिर्सिँदै चारवटै बुवाका छोरा बन्धा, सन्धा, सुकराम बसेर अंश दिने सहमति गरेको इतवरीयाले बताए । ‘वर्षौंदेखि आफ्ना दाजुभाइसँग जग्गाकै लागि बोलिचाली बन्द गरेका थियौँ,’ उनले भने, ‘न्यायपालिकाको पहलमा भाइहरूसँगको सम्बन्ध स्थापित भएको छ । अंशबाट वञ्चित थिए, त्यो पनि पाएँ ।’ भोगचलन गर्दै आएको ऐलानी जग्गाबाट छ कठ्ठामा भोगचलन गर्न दिने गरी सहमति गरिएको नगरपालिकाको न्यायिक शाखाका कर्मचारी सुरेन्द्रप्रसाद भट्टले बताए ।

‘राना बन्धुको वर्षौंदेखिको जग्गा विवाद रहेको थियो,’ उनले भने, ‘पक्ष विपक्षलाई सँगै राखेर उजुरी आएको दुई दिनमै छलफल गरी सौर्हाद रूपमा विवाद टुंग्याएका छौँ ।’ वडाध्यक्ष, न्यायिक समितिका संयोजक, जग्गा नापजाँच गर्ने अमिनको रोहबरमा फिल्डमा गएर जग्गा बाँडफाँट गरिने भएको उनको भनाइ छ ।

स्थानीय सरकार सञ्चालन ऐन २०७४ को दफा ४७ अनुसार न्यायिक समितिको अधिकार क्षेत्रभित्र पर्ने भएकाले आइन्दा दुवै पक्षले मिलेर बस्ने, एक अर्कालाई गाली बेइज्जती नगर्ने सम्बन्धमा दुवै पक्षलाई न्यायिक समितिमा उपस्थित गराएर छलफलपछि मिलापत्रसमेत गरिएको उनले बताए । नगरपालिकाका न्यायिक समितिको संयोजक तथा उपप्रमुख कल्पना पन्तका अनुसार रानाका जस्तै न्यायिक समितिमा ज्याला मजदुरी, रकम लेनदेन, जग्गासम्बन्धी, अंश, बाटो, कुुलो तथा खानेपानी सम्बन्धीका २४ विवादमा चालु आर्थिक वर्षमा मिलापत्र गरिएको छ ।

दुई विवादका उजुरी विचाराधीन अवस्थामा छन् । न्यायपालिकामा ६ वटा नयाँ विवाद दर्ता भएका छन् । न्यायपालिकामा आएका सबै विवादको पक्ष विपक्षलाई सँगै राखेर जित-जितको भावना राखेर मिलापत्र गराइँदै आएको नगर उपप्रमुख पन्तको भनाइ छ । रासस