‘मारुनी’ को ‘जाम्न माया जाम’

काठमाडौं । नवल नेपालले निर्देशन गरेको चलचित्र ‘मारुनी’ को पहिलो गीत सार्वजनिक भएको छ । पूनम इन्टरटेन्मेन्टको ब्यानरमा निर्माण भएको उक्त चलचित्रको गीतको काठमाडौंमा आयोजित कार्यक्रममा रिलिज गरियो ।

रिक्की शाक्यको शब्द रहेको उक्त गीतमा गायक दीपक बज्राचार्यले स्वर तथा संगीत दिएका छन् । गीतको भिडियोमा अभिनेता पुष्प खड्का र अभिनेत्री साम्राज्ञी राज्यलक्ष्मी शाहको साथमा सय बढी कोरसलाई फिचर्ड गरिएको छ । गीतको भिडियोलाई प्रवीण सिंहले कोरियोग्राफी गरेका हुन् ।

कार्यक्रममा निर्देशक नेपाल, निर्मात्री पूनम गौतम, अभिनेता पुष्प खड्का, अभिनेत्री साम्राज्ञी राज्यलक्ष्मी शाह र रेबिका गुरुङ, गीतका गायक दीपक बज्राचार्य, छायांकार सञ्जय लामालगायत उपस्थित थिए ।

गीतको भिडियोलाई राम्रो बनाउन आफूहरूले कुनै कसर बाँकी नराखेको निर्मात्री गौतमले जिकिर गरिन् । अभिनेता खड्का र अभिनेत्री साम्राज्ञीको डान्ससँगै गरिएको रोमान्स निकै आकर्षक रहेको छ । १३ भदौबाट देशव्यापी प्रदर्शनमा आउने तयारीमा रहेको ‘मारुनी’ ले दर्शकलाई हलसम्म तान्ने निर्देशक नेपालले दाबी गरे ।