अशोक एकल साँझ

काठमाडौं ।
‘जहाँ छन् बुद्धका आँखा स्निग्ध, शान्त र सुन्दर
त्यहाँ छ शान्तिको क्षेत्र मेरो राष्ट्र मनोहर’

ढल्किँदै गएको साँझमा कमलपोखरीस्थित रसियन कल्चर सेन्टरको प्रेक्षालयमा गायक अशोक मुकारुङले शान्त र शालीन हाउभाउमा सांगीतिक प्रस्तुति आरम्भ गरे । बमबहादुर थापा जितालीको शब्द र भजनशिरोमणि भक्तराज आचार्यको आवाज तथा संगीत रहेको उक्त गीतसँगै साँझको सुरुआत् गरेका गायक मुकारुङले त्यसलगत्तै आफ्ना प्रेमपरक गीत गाए । उनले ‘सधैँ साथ दिन्छु भन्थ्यौ’, ‘गंगासरी तिमी बग्नू’, ‘तिमीबाट तिम्रो त्यो मन,’ जस्ता गीत प्रस्तुत गर्दा दर्शक निकै मोहित भएका थिए ।

यसैगरी उनले प्रेमप्रयण, समाज, प्रकृति, संस्कृति लगायतका विषयवस्तुका गीत ‘झुल्केको घामसँगै’, ‘इलामे सहर चियाबारी राम्रो’, ‘पिखुवा खोला’, ‘चैते दसैँ’, ‘हलचल भयो’, ‘पिरती भाका’, ‘पानी त चिसो’ सुनाएर दर्शक श्रोतालाई भरपुर आनन्द दिए । गायनको अन्त्यमा उनले खेमराज गुरुङको शब्द तथा संगीत रहेको गीत सुनाएर माहौललाई उत्कर्षमा पु¥याए, ‘झम्के फुली लाएर कता हिँडेकी सानु ।’

कार्यक्रममा एक दर्जन गीत गाएका उनलाई ‘इलामे सहर’ गीतमा भने गायिका गंगा फियाकले सघाइन् । ग्रामीण पुस्तकालय निर्माण र अक्षयकोष स्थापनाको उद्देश्यले कार्यक्रम आयोजना गरिएको उर्वरा फाउन्डेसन नेपालकी अध्यक्ष देवकी अभिलाषीले जानकारी दिइन् ।

कार्यक्रममा पूर्वअर्थमन्त्री एवं गीतकार एसपी कोइरालाको प्रमुख आतिथ्य र पूर्वसंस्कृति, पर्यटन तथा नागकिर उड्डयनमन्त्री कृपासुर शेर्पाको विशिष्ट आतिथ्य रहेको थियो ।

पाँचथरमा जन्मिएका गायक मुकारुङ सिंगापुर पुलिस फोर्समा १८ वर्ष सेवा गरी हाल नेपालमा आएर अवकाशप्राप्त जीवनलाई गायन क्षेत्रमै समर्पित गरिरहेका छन् । उनका दर्जनौँ गीत लोकप्रिय छन् । प्रस्तुत कार्यक्रमबाट आफू उत्साहित भएको मुकारुङले प्रतिक्रिया दिए ।

कार्यक्रममा मुकारुङलाई संगीतकार राजु सिंहको संयोजनमा मोहनकृष्ण कार्की ढली, नारायणदास कार्की ढली, मनोहर सुनाम, किशोर कार्की ढली, रविन कार्की ढली, अनुपदास, सुरज प्रधान, सञ्जीव लिम्बू, दिनेशराज रेग्मी, जयप्रकाश जोशी, जगन्नाथ दगुडा, भुपेन्द्र रसाइली, कुन्दन साह, बलराम समाल, हेमन्त कान्छा लगायतका संगीतकर्मीले साथ दिएका थिए । यो गायक मुकारुङको पहिलो एकल सांगीतिक साँझ हो ।