विश्व

अमिताभले तिरे किसानको ऋण

एजेन्सी २०७५ मंसिर ६ गते ८:४३ मा प्रकाशित

मुम्बई । भारतीय चलचित्र उद्योग बलिउडमा महानायक भनेर चिनिएका अमिताभ बच्चनले सयौँ किसानहरूको ऋण तिरिदिएका छन् । आफूले चार करोड भारतीय रुपैयाँभन्दा बढी रकम तिरेर १ हजार ३ सय ९८ किसानलाई ऋणमुक्त गराएको उनले जनाएका छन् ।

मंगलबार आफ्नो ब्लगमा उनले त्यसबाट आफूलाई केही गरेको अनुभूति भएको लेखेपछि त्यसबारे थाहा भएको हो । उनले सघाएका किसानहरू उत्तरप्रदेश राज्यका हुन् । बच्चनको जन्म पनि सोही राज्यमा भएको हो ।

भारतमा हजारौँ किसानहरू ऋण तिर्न नसक्ने अवस्थामा छन् । सुक्खा, भूमिगत पानीको सतहमा क्षय, उत्पादनमा कमी र कृषिमा आधुनिकीकरणको अभावका कारण दशकौँदेखि भारतीय कृषि उद्योग प्रभावित भएको छ ।

सन् १९९५ देखि कम्तीमा पनि तीन लाख किसानले आत्महत्या गरेका छन् । बच्चनले यो वर्ष पहिला पनि महाराष्ट्र राज्यका ३ सय ५० किसानको ऋण तिरिदिएका थिए । गत वर्ष ऋण मिनाहा हुनुपर्ने र कृषि उत्पादनको मूल्य राम्रो हुनुपर्ने मागसहित त्यहाँ हजारौँ किसानहरूले विशाल प्रदर्शनहरू गरेका थिए ।

७६ वर्षीय बच्चन भारतका उत्कृष्ट र लोकप्रिय कलाकार हुन् । उनले सरकारी स्वामित्वमा रहेको बैंक अफ इन्डियालाई ती किसानको तर्फबाट ऋण तिरिदिएका हुन् । उनका अनुसार सो बैंकले किसानहरूको ऋण फस्र्याेट गरेको प्रमाणपत्र जारी गरेको छ ।

उनले लेखेका छन्, ‘म व्यक्तिगत रूपमै उनीहरूको ऋण तिरिएको जानकारी दिन चाहन्छु ।’ सबै किसानलाई आफू बस्ने मुम्बई सहरमा ल्याउन असम्भव भएकाले तीमध्ये ७० जना लखनउबाट रेलमा आउने उनले लेखेका छन् । उनीहरू नोभेम्बर २६ सोमबार मुम्बई पुग्ने अपेक्षा गरिएको छ । बच्चन आफैँले उनीहरूलाई कागजपत्र हस्तान्तरण गर्नेछन् ।

बच्चन केही वर्ष पहिला एउटा जग्गा विवादमा परेका थिए । सन् २००७ मा अदालतले ९० हजार स्क्वायर फुट क्षेत्रफल भएको एउटा जग्गा अनधिकृत रूपमा उनको स्वामित्वमा पुगेको निर्णय सुनाएको थियो । बच्चनले जालसाजीको मुद्दा खेप्नुपरेको थियो । तर, जग्गामाथि स्वामित्वको दाबी त्यागेपछि उनीविरुद्ध लगाइएका अभियोगहरू फिर्ता भएका थिए ।

बच्चनले १ सय ९० भन्दा बढी चलचित्रमा अभिनय गरेका छन् । उनी हलिउडका केही चलचित्रमा पनि देखापरेका छन् । बच्चनले लोकप्रिय टीभी कार्यक्रम ‘कौन बनेगा करोडपति’ सञ्चालन गर्दै आएका छन् ।

प्रतिक्रिया

पछिल्ला अपडेट्स

लोकप्रिय