प्यूठानमा बालविवाह गर्ने दुई पुरुष प्रहरी हिरासतमा

प्यूठान, ३० फागुन । प्यूठान जिल्लामा बालविवाह रोक्ने अभियान सञ्चालन भइरहेको समयमा बालविवाह गर्ने दुई पुरुषलाई प्रहरीले आफ्नो नियन्त्रणमा लिएको छ ।

गोठिवाङ–३ मा बालविवाह गर्ने दुई जनामाथि इलाका प्रहरी कार्यालयमा भिगृमा उजुरी दर्ता भएको र अभियुक्तलाई प्रहरीले उनीहरुकै घरबाट पक्राउ गरी अनुसन्धान सुरु गरेको प्रहरी नायब उपरीक्षक तुलबहादुर कार्कीले बताए ।

‘स्थानीय १५ र १६ वर्षीया बालिकालाई विवाह गर्ने २१ वर्षीय दोणबहादुर नेपाली र १८ वर्षीय राजु नेपालीलाई प्रहरीले अनुसन्धान सुरु गरेको छ ।’

प्रनाउ कार्कीले भने, ‘बालविवाह रोक्ने गरी जिल्लामा सञ्चालन भएको अभियानले यस्ता घटना बाहिर आउने दर बढेको छ ।’ बालविवाहको उजुरी प्रमाणित भएमा बालविवाह कसुर ऐनअनुसार कानुनी कारबाही हुने बालअधिकार अधिकृत सुशीला सिंखडाले जानकारी दिए ।

जिल्लामा बालविवाह घटना न्यूनीकरण गर्नका लागि जिल्ला बालकल्याण समितिले एक नगरपालिका र ४२ वटा गाविसमा बालविवाह न्यूनीकरण अभियान सुरु गरेको बालकल्याण समितिका अध्यक्ष मेघराज भट्टले बताए ।

अभियान सञ्चालन भएपछि बालविवाह विरुद्ध प्रहरीमा झन्डै एक दर्जन उजुरी आएका छन् ।

यसैबीच विगत एक वर्षदेखि बेवारिसे अवस्थामा रहेकी ११ वर्षीया एक बालिकाको माइती नेपालले प्यूठानबाट उद्धार गरेको छ । जिल्ला बालकल्याण समिति र जिल्ला प्रशासन कार्यालयको समन्वयमा बालिकाको उद्धार गरिएको हो ।

बिजुवार क्षेत्रमा बेवारिसे अवस्था रहँदै आएकी बालिकाको माइती नेपाल भैरहवामा जिम्मा लगाइएको प्रमुख जिल्ला अधिकारी रामबहादुर कुरुम्वाङले बताए ।

बेवारिसे अवस्थामा रहेकी बालिकामाथि यसभन्दा पहिला विभिन्नखाले हिंसा हुने गरेको बालअधिकार अधिकृत सिंखडाले बताए ।