बारका पूर्व अध्यक्ष ढुङगानाको निधन

काठमाडौं, २६ असोज । नेपाल बार एसोसिएसनका पूर्व अध्यक्ष एवं वरिष्ठ अधिवक्ता वासुदेव ढुङगानाको निधन भएको छ ।
महाराजगञ्जस्थित शिक्षण अस्पतालमा उपचारका क्रममा ढुङगानाको आज विहान करिव साढे एक बजे निधन भएको नेपाल बार एसोसिएसनका अध्यक्ष प्रेमबहादुर खड्काले जानकारी दिए । खानामा अरुचि भएपछि ढुङगानालाई उपचारका लागि अस्पताल भर्ना गरिएको थियो ।
विक्रम संवत १९८७ पुस महिनाको शुक्लपूर्णीका दिन काठमाडौंको सीतापाईलामा जन्मीएका ढुङगानाको ८२ वर्षको उमेरमा निधन भएको हो । उनका पत्नी, दुई छोरा र दुई छोरी छन् ।
२०२५ सालमा कानून तथा न्याय मन्त्री भएका ढुङगाना काठमाडौं महानगरपालिकाका पूर्व मेयर पनि हुन् । अमेरिकाका लागि नेपाली राजदूत समेत भईसकेका ढुङगाना सर्वोच्च बारका अध्यक्ष र न्यायपरिषद्को सदस्य समेत भएका थिए ।
सर्वोच्च अदालत परिषरमा उनलाई श्रद्धाञ्जली दिईएको छ । उनको आजै पशुपति आर्यघाटमा दाहसंस्कार हुने परिवारजनले जनाएका छन् ।