ज्योति विकास बैंकले मनायाे १८औं वार्षिकोत्सव

काठमाडाैँ । ज्योति विकास बैंकले स्थापनाको १८औं वार्षिकोत्सव सम्पन्न गरेको छ । सहज पहुँचसहितको बृहत वित्तीय सेवा तथा वित्तीय सूचना प्रवाहमार्फत समस्त नागरिकको जीवनमा सार्थक र दिगो समृद्धि ल्याउने मूल उद्देश्यका साथ २०६५ साल श्रावण ०९ गते स्थापना भएको याे बैंक गौरवमय १८ वर्षको यात्रा पूरा गरी १९औँ वर्षमा प्रवेश गरेको हाे ।

उक्त समारोहमा बैंकका सञ्चालक समितिका सदस्यहरु, भूतपूर्व अध्यक्षहरु, भूतपूर्व सञ्चालकहरु, प्रमुख कार्यकारी अधिकृत एवम् कर्मचारीहरूको उपस्थिति रहेकाे वार्षिकोत्सव समारोहकाे बैंकका अध्यक्ष हरिचन्द्र खड्काले उद्घाटा गरे र

वार्षिकोत्सवको अवसरमा बैंकले संस्थागत सामाजिक उत्तरदायित्व (CSR) का निम्ति स्थापित ‘हाम्रो विकास प्रवर्द्धन कोष’ मार्फत विभिन्न प्रभावकारी कार्यक्रमहरूको घोषणा तथा सम्बन्धित संस्थाहरूसँग सम्झौता गरेको छ ।

बैंकले तिलगंगा इन्सटिच्युट अफ अफ्थाल्मोलोजीसँगको सहकार्यमा ४० जना विपन्न तथा लक्षित वर्गका व्यक्तिहरुलाई नि:शुल्क आँखादान शल्यक्रिया (Corneal Transplantation) मा सहयोगको लागि सम्झौता गरेको छ । यस शल्यक्रिया पश्चात् अन्धकारमय जीवन बिताइरहेका यी नागरिकहरूले फेरि एक पटक संसारको उज्यालो र सुन्दरता आँखाभरि भर्ने छन्, र यो पुनर्जागरण बैंकको सामाजिक उत्तरदायित्वको सबैभन्दा अर्थपूर्ण उपलब्धिमध्ये एक हुने बताइएकाे छ ।

बैंककाअनुसार राष्ट्रिय आविष्कार केन्द्रसँगको साझेदारीमा दुर्गम क्षेत्रका स्वास्थ्य संस्थाहरूमा १० वटा ‘न्यानो नानी’ बेबी वार्मर उपकरण जडान गरिनेछ। यी उपकरणहरूले नवजात शिशुहरूको जीवनरक्षा गर्न तथा नवजात शिशुहरुलाई अल्पताप (Hypothermia) को जोखिम बाट सुरक्षित राख्न महत्त्वपूर्ण भूमिका निर्वाह गर्ने अपेक्षा गरिएको छ । यी कार्यक्रमहरूले स्वास्थ्य सेवामा सीमित पहुँच भएका तथा सेवाबाट वञ्चित समुदायमा गुणस्तरीय स्वास्थ्य सेवाको पहुँच अभिवृद्धि गर्दै उनीहरूको जीवनमा सकारात्मक र दिगो प्रभाव पार्ने बैंकको विश्वास रहेको छ।

वार्षिकोत्सवको अवसरमा बैंकले कर्मचारी तथा उनीहरूका बालबालिकामा निहित प्रतिभा, सिर्जनशीलता र कलात्मक क्षमताको पहिचान, प्रवर्द्धन तथा प्रोत्साहन गर्ने उद्देश्यले “Jyoti’s Got Talent” को तेस्रो संस्करण आयोजना गरेको थियो । विविध कलात्मक तथा सिर्जनात्मक प्रस्तुतिहरू समावेश गरिएको प्रतियोगिताका उत्कृष्ट सहभागीहरूलाई बैंकका अध्यक्ष हरि चन्द्र खड्का र प्रमुख कार्यकारी अधिकृत कपिल ढकालले ट्रफी तथा प्रमाणपत्र प्रदान गरे ।

प्रतियोगितामा सहभागीहरूलाई उनीहरूको उत्साहजनक सहभागिता तथा प्रतिभाको कदरस्वरूप प्रशंसापत्र प्रदान गरिएको थियो ।

कार्यक्रमलाई सम्बोधन गर्दै बैंकका अध्यक्ष हरिचन्द्र खड्काले बैंकको १८ वर्षको सफल यात्रालाई सार्थक बनाउन निरन्तर साथ, सहयोग र विश्वास प्रदान गर्ने ग्राहकवर्ग, शेयरधनी, नियामक निकाय, कर्मचारी तथा सम्पूर्ण शुभेच्छुकप्रति हार्दिक कृतज्ञता व्यक्त गरे ।

बैंकका प्रमुख कार्यकारी अधिकृत कपिल ढकालले बैंक स्थापनाको परिकल्पना गर्ने संस्थापक सञ्चालकहरू, पूर्व अध्यक्षहरु, कर्मचारीवर्ग, शेयरधनी, ग्राहकवर्ग तथा सम्पूर्ण सरोकारवालाप्रति हार्दिक कृतज्ञता व्यक्त गरे । बैंकले विगत १८ वर्षमा हासिल गरेका संस्थागत उपलब्धि, सेवामूलक पहल तथा संस्थागत सामाजिक उत्तरदायित्वअन्तर्गत सञ्चालित विविध कार्यक्रमहरूबारे प्रकाश पार्दै उहाँले बैंकले आत्मसात् गरेको उद्देश्य, ध्येय र संस्थागत आकांक्षालाई मूर्तरूप दिन आगामी दिनमा अझ सुदृढ, प्रभावकारी र परिणाममुखी ढंगले अघि बढ्ने प्रतिबद्धता व्यक्त गरे ।

ज्योति विकास बैंकले उपत्यका र उपत्यकाबाहिर गरी हाल ११७ शाखा कार्यालय, ३ विस्तारित काउन्टर तथा ७५ वटा एटीएम मार्फत बैंकिङ सेवा उपलब्ध गराउँदै आइरहेको छ ।.