यी २५ क्षेत्रमा हड्ताल गर्न नपाइने

काठमाडौँ । सरकारले २५ वटा आवश्यक सेवा क्षेत्रमा हड्ताल गर्न नपाइने व्यवस्था गरेको छ। आवश्यक सेवा सञ्चालन ऐन, २०१४ को दफा ३ को उपदफा १ बमोजिम प्राप्त अधिकार प्रयोग गरी सरकारले हड्ताल निषेधसम्बन्धी सूचना राजपत्रमा प्रकाशित गरेको हो । सरकारले डाँक, तार तथा टेलिफोन सेवा, जल, स्थल र हवाई यातायात सेवा, सञ्चार तथा सरकारी छापाखाना लगायतका क्षेत्रलाई आवश्यक सेवाका रूपमा तोकेको छ ।

त्यस्तै, खानेपानी, पेट्रोलियम पदार्थ, अस्पताल तथा स्वास्थ्य सेवा, औषधी आपूर्ति, फोहोरमैला व्यवस्थापन, बैंक तथा बीमा सेवा, विद्युत् आपूर्ति, दैनिक उपभोग्य वस्तु वितरण तथा राहदानी सेवा पनि यस सूचीमा समावेश छन्।

यी सेवामा हड्ताल गर्न निषेध गरिएको सरकारले जनाएको छ। आवश्यक सेवा अवरुद्ध हुँदा जनजीवन प्रभावित हुने भएकाले यस्तो निर्णय गरिएको सूचनामा उल्लेख छ।

सरकारले हडताल गर्न निषेध गरेका २५ आवश्यक सेवा

१. डाँक, तरा वा टेलिफोन सेवा

२. जल, स्थल वा हवाईजहाज मार्गबाट यात्री वा मालसामान ओसारपसार गर्ने यातायात सेवा

३. हवाई अड्डा वा हवाईजहाजको देखभाल, त्यसको सञ्चालन वा मर्मत गर्ने कामसँग सम्बन्धित सेवा

४. हवाई ग्राउन्ड, रेल्वे स्टेसन वा सरकारी गोदाममा मालसामान
ओसारपसार गर्ने वा राख्ने, झिक्ने वा थन्क्याउने कामसँग सम्बन्धित सेवा

५. प्रिन्ट वा सरकारी छापाखानासम्बन्धी सेवा

६. हातहतियार, खरखजाना वा अरू कुनै सैनिक सरसामानको उत्पादन गर्ने, थन्क्याउने, वितरण गर्ने कामसँग सम्बन्धित नेपाल सरकार रक्षा व्यवस्थाको कुनै सेवा

७. सञ्चार सेवा

८. आन्तरिक सुरक्षा कार्यसँग सम्बन्धित सेवा

९. खानेपानीको सञ्चालन तथा वितरण सेवा

१०. पर्यटन आवास, मोटेल, होटेल, रेस्टुराँ र रिसोर्टसम्बन्धी सेवा

११. पेट्रोलियम पदार्थ (एलपी ग्यास समेत)को पैठारी, ढुवानी, भण्डारण तथा वितरणसम्बन्धी सेवा

१२. अस्पताल तथा स्वास्थ्य केन्द्र सञ्चालनसम्बन्धी सेवा (एम्बुलेन्सजस्ता सेवाहरू)

१३. औषधि निर्माण तथा बिक्री वितरणसम्बन्धी सेवा

१४. फोहोरमैलाको संकलन, ढुवानी, प्रशोधन, विसर्जन, स्थान निर्माण, पूर्वाधार निर्माण र संकलनस्थल एवं व्यवस्थापन क्षेत्रसँग सम्बन्धित सेवा

१५. बैंकिङ सेवा

१६. बिमा सेवा

१७. विद्युत् सेवा

१८. दैनिक उपभोग्य वस्तुहरू (खाद्यान्न, दाल, चामल, नुन, तेल)को पैठारी, ढुवानी, भण्डारण तथा वितरणसम्बन्धी सेवा

१९. मौसम पूर्वानुमान, बाढी पूर्वानुमान तथा पूर्वसूचना सेवा

२०. मास्कसम्बन्धी सेवा

२१. ह्यान्ड स्यानिटाइजरसम्बन्धी सेवा

२२. भेटेरिनरी सेवा

२३. कन्सुलर सेवा विभागबाट प्रदान हुने सेवा

२४. राहदानी विभागबाट प्रदान हुने सेवा

२५. इन्टरनेट सेवा ।