ठूला भ्रष्टाचारमा ठूला नेताहरुको हात छ : शेखर कोइराला

पाँचथर । नेपाली कांग्रेसका वरिष्ठ नेता डा शेखर कोइरालाले ठूलो भ्रष्टाचारका काण्डहरुमा ठूला नेताहरुको हात रहेको उल्लेख गरेका छन् । नेपाल प्रेस युनियन पाँचथरले बिहीबार फिदिममा आयोजना गरेको पत्रकार सम्मेलनलाई सम्बोधन गर्दै कोइरालाले भ्रष्टाचारको काण्डमा नेताहरुको नाम मुछिएपछि ढाकछोप गरिएको बताए ।

‘सुन काण्डमा ठूला नेता मुछिएपछि सामसुम भयो,’ कोइरालाले भने, ‘एनसेल खरिद बिक्री काण्डमा पनि त्यस्तै भएको छ ।’ देशमा दलका नेता, व्यापारी र कर्मचारीहरु मिलेर ठूला ठूला भ्रष्टाचार गरेको कोइरालाले उल्लेख गरे ।

पत्रकारसँग कुरा गर्दै उनले अहिलेको सरकारले देशलाई निकास दिन नसक्ने बताए । देशलाई निकास दिन प्रधानमन्त्री परिवर्तन गर्न कोसिस भइरहेको कोइरालाको भनाई थियो ।

अहिलेको सरकाले देशलाई बरवाद गरेको उनले जिकिर गरे । ‘देशलाई बचाउन सरकार परिवर्तन अपरिहार्य भइसक्यो,’ उनले भने, ‘संसदीय व्यवस्थामा गणितको खेल हुन्छ, राम्रो सरकार निर्माणका लागि हामी पहल गरिरहेका छौँ ।’

देशको अर्थतन्त्र डामाडोल भएको उल्लेख गर्दै उनले बैंकहरु पनि मिटरब्याजी भएको उल्लेख गरे । उद्योगी र बैंकर्ष एउटै व्यक्ति हुनु नहुने कोइरालाले उल्लेख गरे । ‘नेपालमा उद्योगी र व्यापारीले नै बैंक सञ्चालन गरेका छन्,’ कोइरालाले भने, ‘यसरी एउटै व्यक्ति सबैतिर हुनु ठीक हैन् ।’