‘नेतालाई दिएर भोट, हिँडे युवा कमाउन नोट’

पिठ्युँमा झोला, बायाँ हातमा पासपोर्ट र दायाँ हातले सुटकेस समातेर विमानस्थल पस्दै गर्दा बिदाइ गर्न आएका छोरा, छोरी र श्रीमतीले गरुँगो मनले हात हल्लाए । संखुवासभा बानाका द्रोण कोइराला (३८) ले पनि हात हल्लाउँदै बिदाइको जवाफ फर्काए मन गरुँगो बनाउँदै । यही मंसिर ४ मा भएको आमनिर्वाचनको सरगर्मीमा रमाउँदै आफ्नो कर्मथलोतर्फ उनी लागेका हुन् । कोइरालासँगै खाडी मुलुक जाने अन्य युवा श्रमिकहरू पनि त्यसरी नै हात हल्लाउँदै विमानस्थलभित्र पसे । सबैका आँखा रसिला थिए, व्यथा एउटै थियो । परिवारसँगै बसेर रोजगारी गर्ने चाहना हुँदाहुँदै केही उपाय नदेखेपछि घर व्यवहार चलाउन उनीहरू विदेशी भूमिमा पसिना बगाउन हिँडेका थिए ।

श्रमिकका रूपमा मलेसियामा आठ वर्ष बिताएपछि केही महिनाअघि कोइराला नेपाल फर्कंदा मुलुकभर चुनावको माहोल गर्मराउँदै थियो । उनको गाउँ संखुवासभाको बाना पनि राजनीतिक दलका चर्का चुनावी नाराले गुल्जार बन्दै थियो । केही समयपछि उनी मलेसिया फर्कने समय आयो ।
गाउँमा चुनाव पनि आयो, आफन्त, छिमेकीहरू कुन उम्मेदवारलाई मतदान गर्ने भन्ने छलफलमा जुट्दै गर्दा उनलाई भने खल्लो अनुभव भयो । कारण उनी मतदाता हुनु हुन्थेन । त्यसैले भोट हाल्न पाएनन् । लामो समय परदेश बसेकाले उनले मतदाताको सूचीमा नाम लेखाउन पाएनन् । विदेशबाटै नाम लेखाउने व्यवस्था थिएन । ‘चुनावका दिन मत हाल्न नपाउँदा मन खिन्न त भयो नि’, उनले भने, ‘मत हाल्न नपाए पनि केही छैन, तर राम्रो उम्मेद्वारले जितोस् ।’

बुधबार दिउँसो एयर अरेबियाको विमानबाट मलेसिया जाने तरखरमा कोइराला लाग्दै गर्र्दा मुलुकभर जोडतोडका साथ मतगणना चलिरहेको छ । मतपेटिकाभित्र देशभरबाट संकलित मतपत्रमा उनी र उनी जस्तै कैयन युवाले दिएको मत भने परेको थिएन । मतको तथ्यांकमा उनीहरूको हिस्सा नभए पनि बुधबार श्रमका लागि बिदेसिने करिब १५ सयको सूचीमा उनीहरूको नाम सरकारले सुरक्षित राखेको छ । किनभने सरकारले त्यही सूची हेरेर अर्को महिना रेमिट्यान्स बढ्ला कि घट्ला भन्ने प्रक्षेपण गर्नेछ र सोहीअनुसार नीति बनाउनेछ ।

चुनावका दिन भोट हाल्न नपाउँदा मन खिन्न भए पनि मतगणना हुँदै गर्दा देखिएका सुरुआती नतिजाले भने उनलाई खुसी बनाएको छ । ‘पुराना नेताले केही गरेनन्, यो चुनावबाट नयाँ नेता आइदिएहुन्थ्यो भन्ने लागेको थियो, त्यस्तै हुन्छ कि भन्ने लागेको छ’, उनले भने, ‘नयाँ नेताले यहीँ बस्ने र काम गर्ने वातावरण बनाइदिए उताभन्दा आधा तलब भए पनि आफ्नै देशमा काम गर्न पाए पुग्थ्यो ।’

कोइरालासँगै श्रम गर्न मलेसिया जाँदै गरेका जनकपुरका दिलचन मुखियालाई पनि चुनावमा मतदान गरेर खाडीमा श्रमदान गर्न जानपुर्दा निको लागेको छैन । ‘हामी त भोट न हाल्ने हो, नेतालाई भोट चाहिएको छ र हामीलाई नोट’, मुखियाले भने, ‘हामीसँग भएको भोट दियौँ, अब नोट कमाउन मलेसिया जाँदै छु ।’ उनको भाइ स्वास्थ्य सहायक विषय पढ्दै छन् । मलेसियामा कमाएको केही पैसा उनको पढाइ खर्च र बाँकी परिवारलाई पठाइदिने उनले सुनाए ।

पाँचथर निक्लाजुङ–६ का निलम राई पनि बुधबार विमानस्थलभित्र पस्ने श्रमिकहरूको लाइनमा भेटिए । उनी श्रम भिसामा दोस्रोपटक दक्षिण कोरिया जाँदै थिए । कोरियाको कमाइले सन्तुष्ट मिले पनि दुःख सम्झँदा थोरै तलब भए पनि देशमै बसौँ भन्ने लाग्छ उनलाई । ‘कोरियामा त दुःख कति छ भनेर कुरा नगरौँ होला, त्यही तलब चार लाखसम्म हुन्छ भनेर मात्रै चित्त बुझाउने हो’, उनले भने ।

राई चुनावपछि बन्ने नयाँ सरकारले आफू जस्ता युवाका लागि स्वदेशमै जागिर खाने नीति ल्याइदिए हुन्थ्यो भन्ने आशा राख्छन् । ‘मुलुक रेमिट्यान्सले धानेको छ, रेमिट्यान्स आएन भने पेट्रोलदेखि खाद्यान्न किन्ने पैसा पनि हुन्न, यही रेमिट्यान्सले गाडीदेखि सबै किन्नुपरेको छ’, राईले भने, ‘अबको सरकारले सस्तो ब्याजदरमा ऋण दिएर उद्यमशीलताका लागि काम गरे हुन्थ्यो, जागिर खाने वातावरण बनाइदिए हामीजस्ता युवा विदेशिन पर्दैनथ्यो होला ।’

राईजस्तै दोस्रोपटक कोरिया जान लागेका बाग्लुङ भीमपोखराका विष्णुप्रसाद शर्मा (३१)ले आफू रहरले नभई बाध्यताले विदेश जानु परेको बताए । ‘गाउँमा चुनावको माहोल बढ्दै थियो, तर मंसिर १ मा काठमाडौं आउनु परेकाले मतदान गर्न पाइनँ’, उनले भने, ‘मतदान गर्न पाएको भए रमाइलो हुन्थ्यो तर केही छैन कोरियामा श्रमदान गरेर भए पनि देशका लागि सहयोग पु¥याउनेछु ।’

पाँचथरका राईको जस्तै सोच रामेछापका सूर्यबहादुर कार्कीको पनि छ । चार वर्ष मलेसियामा कमाएको १० लाख रुपैयाँ खर्चेर गोकर्णेश्वरमा सुरु गरेको गोलभेँडा खेतीमा लगानी डुबेपछि उनी बुधबार फेरि मलेसिया जान लागेका थिए । ‘अघिल्लो वर्ष कोरोना महामारीले केही गर्न सकिएन भने गत वर्ष समयमा बिउ पाइएन’, उनले भने, ‘समयमै काम हुन नसक्दा उत्पादन कम भयो, त्यही उत्पादनले पनि बजारमा राम्रो भाउ पाएन, अनि लगानी डुब्यो ।’

बुधबार एयर अरेबियाको विमानमार्फत् मलेसिया जान लागेका २७ जनाको समूहका कार्की कृषिमा राम्रो गर्न सकिने भए पनि सो अनुसारको सरकारले वातावरण बनाउन नसकेको बताउँछन् । ‘अर्बौं रकमको डलर खर्चेर तरकारी खानुपरेको छ, त्यही पैसा कमाउन हामी विदेश हिँडेका छौँ तर स्वदेशी उत्पादनलाई प्रोत्साहन नै गरेको देखिन्न’, उनले भने, ‘सकेसम्म विदेश नजाऔँ यतै केही गरौँ भनेर व्यावसायिकरुपमा गोलभेँडा खेती सुरु गरेँ तर काम गर्ने उपयुक्त वातावरण नहुँदा बीचमै व्यवसाय छाडेर विदेश पलायन हुनुप¥यो ।’

परिस्थितिले खाडी जाने श्रमिकका पीडा बुझ्न खोज्ने नेताहरू नभएको कञ्चनपुरका नरेश बोहोराको बुझाइ छ । मलेसिया जान अघिल्लो दिन मात्रै काठमाडौं आएका उनले भने, ‘हाम्रो कुरा राजनीति गर्नेले बुझ्दैनन्, बुझ्ने भए यसरी विदेशिनुपर्ने बाध्यता नै हुँदैन होला ।’ बोहोरा चुनावलाई लिएर त्यति उत्साही पनि हुनुहुन्न । ‘चुनाव त आउँछ जान्छ, नेताहरू फेरिन्छन्, सरकार बनाउनेहरू फेरिन्छन्’, उनले भने, ‘तर हाम्रा दुःख फेरिन्नन्, विदेश जानुपर्ने अवस्था बदलिन्न ।’

चुनावपछि मतगणना चलिरहँदा राजनीतिक दलहरूबीच कसले सरकार बनाउने भन्ने गृहकार्य सुरु भइसकेको छ । तर विमानस्थलमा झोला बोकी पैसा कमाउन बिदेसिने श्रमिकहरूका बारेमा कमैले ध्यान दिएको पाइन्छ । चुनावका दिन मतदान गरेर श्रमदान गर्न बिदेसिने युवाहरू अबको सरकारले आफ्नाबारेमा पनि ध्यान देओस् र स्वदेशमै बस्ने वातावरण बनाइदिओस् भन्ने चाहेका छन् । – रासस

प्रतिक्रिया