खोटाङ । जिल्ला अस्पताल खोटाङमा भाइरल ज्वरोका बिरामीको चाप ह्वात्तै बढेको छ । हप्ता दिनयता अधिक ज्वरो आउने, टाउको, जोर्नी, घाँटी दुख्ने, शरीर थाक्ने र गल्ने लगायतका लक्षण देखिने बिरामीको चाप बढेको हो ।
जिल्ला अस्पतालको ओपिडी (बहिरंग) सेवामा दैनिक १ सय ५० को हाराहारीमा बिरामी उपचारमा आउने गरेको डा.पुष्कल राईले बताए । ‘जाँचमा आएकामध्ये ५० देखि ६० प्रतिशत बिरामीलाई कोरोना भाइरसको लक्षण देखिएको छ’, उनले भने, ‘उनीहरूलाई आवश्यक औषधि दिएर कम्तीमा १० दिनसम्म होम आइसोलेसनमा बस्नुस् भनेर उनीहरूको आआफ्नै घर पठाउने गरेका छौँ ।’
कोभिड–१९ को लक्षणसँग मिल्दोजुल्दो लक्षण देखिने समस्याबाट स्वास्थ्यकर्मीसमेत बिरामी पर्न थालेपछि उपचारमा आएका अन्य बिरामी मारमा परेका छन् । जिल्ला अस्पतालका ५८ स्वास्थ्यकर्मीमध्ये १४ स्वास्थ्यकर्मी बिरामी परेको जिल्ला अस्पतालका प्रशासन प्रमुख रविन फुयालले जानकारी दिए ।
सेवा प्रवाहलाई निरन्तरता दिन कतिपय स्वास्थ्यकर्मी औषधि सेवन गर्दै बिरामीको उपचारमा खटिइरहेका छन् । जिल्लामा कोभिड–१९ को लक्षण देखिने भाइरल ज्वरोका बिरामीको संख्या बढ्न थालेपछि त्रास बढेको छ ।
१० स्थानीय तह रहेको जिल्लामा यसअघि सञ्चालन गरिएका कोभिड अस्पताल अहिले निष्क्रिय छन् । कोरोना संक्रमण बढ्दै गएपछि निष्क्रिय अस्पताल पुनः सञ्चालनमा ल्याउन आवश्यक सामग्री जुटाइसकिएको जिल्ला स्वास्थ्य कार्यालय खोटाङका प्रमुख पुण्यप्रसाद सिक्देलले जानकारी दिए ।
कोरोना संक्रमण बढ्दै गएपछि जिल्ला प्रशासन कार्यालय खोटाङले मास्क र स्यानिटाइजर अनिवार्य प्रयोग गर्न आग्रह गरेको छ । जिल्लामा कोभिड–१९ को संक्रमण फैलिन नदिन एवं रोकथाम तथा नियन्त्रण कार्य प्रभावकारी बनाउन सार्वजनिक स्थलमा अनिवार्य मास्क र स्यानिटाइजर प्रयोग गर्न प्रशासनले आग्रह गरेको हो ।
विमानस्थलमा मास्कको प्रयोगलाई अनिवार्य गर्न, सेवाग्राहीको भिडभाड हुने सरकारी कार्यालयमा सेवा लिन आउँदा मास्कको प्रयोगलाई अनिवार्य गर्न आग्रह गरिएको छ । सेवा प्रदायक कार्यालयको प्रवेशद्वारमा स्यानिटाइजरको व्यवस्था मिलाउन र हवाई लगायतका सार्वजनिक यातायातमा मास्कको प्रयोग अनिवार्य गर्ने तथा स्यानिटाइजरको व्यवस्था मिलाउन प्रशासनले आग्रह गरेको छ ।
यस्तै, गोष्ठी, सेमिनार, बैठकजस्ता भिडभाड हुने कार्यक्रममा मास्कको अनिवार्य प्रयोग गर्न र स्यानिटाइजरको व्यवस्था मिलाउन तथा विद्यालय, विश्वविद्यालय, धार्मिकस्थल, भिडभाड हुने प्रकृतिका व्यावसायिक तथा मनोरञ्जनस्थल, रंगशाला आदि सार्वजनिक स्थानमा मास्क लगाउन प्रेरित गर्न सहायक प्रमुख जिल्ला अधिकारी पवित्रप्रकाश साहले जारी गरेको सूचनामा उल्लेख गरिएको छ ।
जिल्ला स्वास्थ्य कार्यालयका अनुसार जिल्लामा यसअघिसम्म ३ हजार ५ सय २ जनामा संक्रमण पुष्टि भएको थियो । विश्वभर महामारीका रूपमा फैलिएको कोरोना भाइरसको संक्रमणबाट जिल्लामा हालसम्म १५ जनाको ज्यान गइसकेको छ । त्यस्तै, हालसम्म १ लाख ७ हजार ४२ ले पूर्ण र १ लाख २१ हजार ४ सय ३० ले पहिलो मात्रा खोप लगाएका छन् । जिल्लामा एक थान भेन्टिलेटर, सात वटा एम्बुलेन्स, दुई सय थान अक्सिजन सिलिन्डर र ३७ थान अक्सिजन कन्सन्ट्रेटर रहेको जिल्ला स्वास्थ्य कार्यालय खोटाङका प्रमुख सिक्देलले जानकारी दिए ।
कोरोना संक्रमण दर वृद्धि हुँदै गएपछि जिल्ला अस्पताल खोटाङमा स्थापना गरिएको अक्सिजन प्लान्टसमेत सञ्चालनमा ल्याइएको अस्पताल सञ्चालन तथा व्यवस्थापन समितिका अध्यक्ष सनबहादुर राईले बताएका छन् । प्रदेश सरकार, १ नं प्रदेश स्वास्थ्य मन्त्रालय विराटनगरको १ करोड ५० लाख लगानीमा स्थापना गरिएको अक्सिजन प्लान्ट गत सोमबारबाट औपचारिक रूपमा सञ्चालनमा ल्याइएको हो ।
प्रतिक्रिया