भारतमा कोरोना संक्रमणमुक्त हुनेको सङ्ख्या ९७.१९ प्रतिशत

नयाँ दिल्ली । भारतमा कोरोना भाइरसबाट संक्रमित भएका मध्ये ९७.१९ प्रतिशत संक्रमणमुक्त भएका छन् । भारतमा अहिलेसम्म तीन करोड सात लाख ५२ हजार ९५० जना संक्रमित भएका छन् भने दुई करोड ९८ लाख ८८ हजार २८४ जना संक्रमणमुक्त भएका छन् ।

त्यसैगरी कुल संक्रमित मध्ये १.४९ प्रतिशत मात्रै अहिले पनि संक्रमित अवस्थामा रहेको संघीय स्वास्थ्य तथा परिवार कल्याण मन्त्रालयले जनाएको छ । भारतमा अहिले पनि संक्रमित अवस्थामै रहेकाहरुको सङ्ख्या चार लाख ५८ हजार ७२७ रहेको मन्त्रालयले सार्वजनिक गरेको विवरणमा उल्लेख छ ।

पछिल्लो एक दिनमा पनि नयाँ संक्रमित हुनेभन्दा संक्रमणमुक्त भएकाहरुको सङ्ख्या धेरै भएकाले सक्रिय संक्रमितको सङ्ख्या पनि घट्दै गइरहेको छ । मन्त्रालयका अनुसार भारतमा पछिल्लो एक दिनमा ४३ हजार ३९३ जना नयाँ संक्रमित थपिएका छन । सोही अवधिमा अरु ४४ हजार ४५९ जना संक्रमणमुक्त भएका छन् ।

मन्त्रालयले पछिल्लो २४ घण्टामा थप ९११ जनाको कोरोना भाइरसका कारण मृत्यु भएको शुक्रबार विहान जानकारी दिएको छ । योसँगै भारतमा अहिलेसम्म कुल मृतकको सङ्ख्या चार लाख पाँच हजार ९३९ रहेको छ ।

देशव्यापी खोप अभियान सञ्चालन भइरहेको भारतमा अहिलेसम्म ३६.८९ करोड मानिसलाई कोरोनाभाइरस विरुद्धको खोप लगाइएको छ । त्यसैगरी बिहीबारसम्म भारतमा कुल ४२ करोड ७० लाख १६ हजार ६०५ जनाको स्वाब परीक्षण गरिएको छ । ती मध्ये १७ लाख ९० हजार ७०८ जनाको स्वाब भने पछिल्लो एक दिनमा परीक्षण भएको हो ।

प्रतिक्रिया