सूर्यमुखी खेतीमा आकर्षित किसान

कुनै समय घरआँगनका डिल, वरपर, करेसाबारी, बगैँचामा, सोख र सुन्दरताका लागि मात्रै लगाइने सूर्यमुखी फूल अहिले भने किसानको खेती भएको छ । यसलाई कृषकले व्यावसायीकरण गर्ने गरेका छन् । त्यसैले अहिले घरआँगनमा गमलामा देखिने सूर्यमुखी फूल अब आम्दानीको माध्यम बनेको छ । पाल्पाका कृषकले सूर्यमुखीको खेती नै थालेका छन् । मकै बालीको तुलनामा कम लगानी, मेहनत तर आम्दानीका हिसाबले दोब्बर बढी हुने भएपछि व्यावसायिकतामा पाल्पाली कृषकको मोह बढेको पाइएको हो । बजारमा तेलको मूल्यवृद्धि हँुदै गएको अवस्थामा यहाँका कृषकले आयआर्जनका निम्ति सूर्यमुखीलाई प्राथमिकता दिन थालेका हुन् । रामपुर नगपालिका–५ बस्ने युवा बलबहादुर रानाको राम्रै मकै बाली उत्पादन हुने खेत यतिखेर सूर्यमुखी फूलले ढकमक्क छ । घर अगाडिको खेतभरि पहेँलै सूर्यमुखी फूल्दा कृषि कार्य गर्दाको सबै थकान मेटिएको उनलाई अनुभूति हुन थालेको छ ।

उनले भने, ‘घर वरपर फूलेको सूर्यमुखी देख्दा काममा काम गर्ने जाँगर बढेर आउँछ, अहिले खेतभरी जताततै सूर्यमुखी फूलेको छ, हराभरा देख्दा मनका अनेकथरि पीडा सबै हराएर जान्छन्, मनमा आनन्दको अनुभूति हुन्छ ।’ अहिले उनले लगाएको सूर्यमुखी खेतीमा हेर्न आउने, फूलको बास्नामाा रमाउने, फूलसँगै रमाउँदै तस्बिर खिच्ने र सामाजिक सञ्जालहरूमा फोटो पोष्ट गर्ने, टिकटक बनाउने, भिडियो बनाउनेको निकै चहलपहल बढेको छ । सूर्यमुखीसँग बालबालिकादेखि युवायुवती, वृद्धवृद्धाहरू सबै उमेर समूहका व्यक्ति फूलसँग रमाउँदै फोटो खिचाउने र सामाजिक सञ्जालमा छरपस्ट राख्नेको होडबाजी नै छ । रामपुरको मुख्य व्यापारिक केन्द्र बेझाड बजार जाने सडक छेउछाउमा फूलेको सूर्यमुखीको लोभलाग्दो दृश्य देखेपछि सवारी साधनमा यात्रा गर्ने यात्रु पनि एकछिन गाडी रोकेर फोटो खिचाएर मात्रै जाने गर्दछन् ।उनको बारीमा दैनिक ३०० भन्दा बढी मानिस फूलमा आएर फोटो खिचाउने, टिकटक बनाउने, भिडियो बनाउने गरेको कृषक प्रभु श्रेष्ठले बताए । उनले भने, ‘खेतमा फुलेको फूलसँग धेरै मानिस अवलोकन गर्ने, रमाउने भेटिन्छन्, विशेषगरी साँझपख भने सूर्यमुखीमा भीड लाग्ने गरेको छ, देख्दै आनन्द लाग्दछ, फुल्न पनि असाध्यै राम्रो फुलको छ ।’

उनले मकै बाली लगाउँदै आएको पाँच रोपनी खेतमा यस वर्ष मकै बाली सट्टा सूर्यमुखी लगाएका छन् । कृषि ज्ञान केन्द्रको छ लाख रूपैयाँ आर्थिक सहयोगमा रामपुर नगरपालिकाको समन्वयमा एक वडा एक उत्पादन कार्यक्रमअन्तर्गत वडा नं ५ को बेझाड खेतमा करिब दुई सय रोपनी क्षेत्रफलमा सूर्यमुखी लगाइएको छ । यी जग्गा पहिला भने यतिखेर मकैले भरिएका हुन्थे । आम्दानी लिन र तेलजन्य पदार्थको उपभोगका लागि कृषकले सूर्यमुखीलाई व्यावसायीकरण गरेका हुन् । अनुदानमा बीउ तथा सिँचाइका लागि कुलो मर्मत तथा पुनःनिर्माणमा सहयोग पाएपछि उत्साहका साथ कृषक सूर्यमुखी खेतीमा लागेका छन् । प्रतिरोपनी चार मुरी मकै उत्पादन हुने खेतमा अहिले पहेँलै सूर्यमुखी फुल्दा मनका पिरहरू खुशीमा परिणत भएको किसान कृष्णकान्त पौडेलले बताए । ‘राम्रै मकै उत्पादन हुने खेतमा सूर्यमुखीबाट अझ धेरै आम्दानी लिनका लागि मकै बाली लगाउन छाडेर सूर्यमुखी लगाउन सुरु गरेको छु, परीक्षणमै राम्रै फल लाग्यो अर्को वर्ष खेती विस्तार गर्नेछु,’ उनले भने ।

तेलजज्य पदार्थको खपत कम गराउन र मकै बालीको तुलनामा यसबाटै धेरै आम्दानी लिन सकिने, मिहिनेत र लगानी पनि कम पर्ने भएकाले सूर्यमुखी खेतीलाई व्यावसायिकरूपमा रोजेको कृषक दुर्गादेवी शर्माले बताए । ‘मकै बालीको तुलनामा सूर्यमुखीबाट धेरै आम्दानी लिन पाइने, लगानी र मिहिनेत कम पर्ने, आफूले उत्पादन गरेको स्वच्छ तेल उपभोग गर्न पाइने भएपछि व्यावसायिक तवरले नै खेती गर्न थालेका छौँ,’ उनले भने । सामान्य तरिकाले लगाउँदा पनि राम्रै फल दिएकाले यस खेतीप्रति कृषक सन्तुष्ट रहेको र अर्को वर्षको लागि व्यवस्थित तरिकाबाट समयमा नै खेती गर्ने सोच राखेको वडा सदस्य विष्णुप्रसाद बस्यालले बताए ।

रामपुर नगरपालिका कृषि शाखा प्रमुख रामहरि पाण्डेयले परीक्षणका रूपमा लगाइएको सूर्यमुखी सोचेभन्दा राम्रो भएको र कृषकले यसलाई निरन्तरता दिन सकेमा बाहिरबाट आउने तेलहन बाली कम गर्न सकिने बताए । रामपुरमा तेलजन्य पदार्थको उत्पादन बढाउन वडा नं ५ ले कोइलीटारीमा तोरी खेती र बेझाड खेतमा पकेट कार्यक्रमअन्तर्गत सूर्यमुखी खेती सुरु गरेको वडाध्यक्ष हिमाल मल्लले बताए । रम्भा गाउँपालिका–१ सघाहा बस्ने ऋषिराम अर्यालले विगत चार वर्षयता बजारको तेल उपभोग नगरेको बताए । आफैँले घरमा उत्पादन गरेको सूर्यमुखीकै तेल उपभोग गर्छन् उनी । उनले गत वर्ष दुई रोपनीमा लगाएको सूर्यमुखीको घरायसी प्रयोजनबाहेक प्रतिलिटर ४ सय ५० रूपैयाँका दरले ४० हजार रूपैयाँको तेल बिक्री गरे । यस वर्ष चार रोपनीमा क्षेत्र विस्तार गरी खेती गरेका छन् ।

अहिले उनकोे खेतमा लगाइएको सूर्यमुखीको उत्पादन सुरु भएको छ । गाउँमै स्वस्थ तेल उत्पादन भएकाले माग बढ्न थालेपछि उनी यस व्यवसायमा हौसिएका हुन् । ‘चार वर्षयता बजारमा खानेतेल किन्नुपरेको छैन, गत वर्षदेखि बिक्री गर्ने गरी खेती गर्न थालेको छु, आफैँले उत्पादन गरेको तेल उपभोग गर्न थालेपछि हाम्रो परिवार स्वस्थ र फूर्तिलो बनेको छ, यो वर्ष चार रोपनीमा लगाएको सूर्यमुखी करिब नौ मुरीसम्म उत्पादन हुने अनुमान गरेको छु,’ उनले भने ।

एक पाथी सूर्यमुखी प्रशोधन गर्दा डेढ लिटर तेल उत्पादन हुने उनले बताए । सूर्यमुखी खेती लगाउन थालेपछि बाँदर आतंक कम भएको छ । उनका अनुसार बाँदर आतंकले किसानले मकै बाली स्याहार्नै पाउदैन थिए । सूर्यमुखी लगाउन थालेपछि भने उनी बाँदरको समस्याबाट मुक्त भएका छन् भने आयस्रोतका हिसाबले यसबाट मकैको दाँजोमा धेरै फाइदा लिएक छन् । यस्तै निस्दी गाउँपालिकाका कृषक पनि सूर्यमुखीमा आश्रित हुन थालेका छन् । गाउँपालिका– ४ को मुढाबास र लामेदमारका कृषकले व्यावसायिक रूपमा सूर्यमुखी खेती गरेका छन् । मुढाबासमा आर्थिक वर्ष ०७५÷७६ मा १ सय १० रोपनी क्षेत्रफलमा सूर्यमुखी पकेट कार्यक्रमअन्तर्गत गाउँपालिकाले एक लाख ५० हजार रूपैयाँ र आव २०७६÷७७ मा लामेदमारमा १ सय १२ रोपनी क्षेत्रफलमा दुई लाख बजेट सहयोगमा व्यावसायिक खेती थालनी गरिएको कृषि शाखा प्रमुख खिमराज कोइरालाले बताए । गाउँमै प्रशोधन केन्द्रको व्यवस्था नहँुदा यहाँ उत्पादन भएको सूर्यमुखी नवलपुरको अरुणखोला बजारमा पुगेर प्रशोधन गर्न कृषक बाध्य छन् ।

मुढाबास पकेट क्षेत्रका हर्षबहादुर सुनारीले सूर्यमुखी खेतीका लागि गाउँपालिकाले आर्थिक सहयोग गरेपछि व्यसायिकरूपमा खेती गर्न थालेका छन् । बगनासकाली गाउँपालिकाले भने मौरीपालनलाई प्राथमिकता दिँदै गत वर्ष ३० रोपनी क्षेत्रफलमा सूर्यमुखी खेतीका लागि कृषकलाई बीउ वितरण गरेको थियो । मौरी चरनका लागि राम्रो हुने भएकाले पनि सूर्यमुखी खेतीमा कृषकले जोड दिने गरेको बगनासकाली गाउँपालिकाका कृषि शाखा प्रमुख राजेश बोहराले बताए ।

कृषि ज्ञानकेन्द्र पाल्पाले यस आर्थिक वर्षमा रामपुरको बेझाड खेतलाई सूर्यमुखीको उपयुक्त पकेट क्षेत्रका रूपमा छनोट गरी खेती सुरु गरेको हो । ज्ञानकेन्द्रका अनुसार केन्द्र सरकारको बजेट र कार्यक्रमलाई स्थानीय सरकारको समन्वयमा रामपुरमा सूर्यमुखीको सम्भावना देखेर पकेट कार्यक्रम सुरु गरिएको छ । दाना झार्न अप्ठ्यारो हुने भएको हुदा त्यसको लागि कृषकले मेसिनको माग गरेको खण्डमा समाधानको पहल गर्ने कृषि ज्ञानकेन्द्र पाल्पाका प्रमुख शिवप्रसाद अर्यालले बताए । उनका अनुसार कृषकले क्षेत्र विस्तार गर्न चाहेमा सूर्यमुखी खेतीमा ज्ञान केन्द्रले लगानी गर्ने अवस्था छ ।

यस वर्ष रामपुर नगरपालिकासँगै निस्दी गाउँपालिका, रम्भा गाउँपालिका, पूर्वखोला, माथागढी गाउँपालिका लगायतका क्षेत्रमा सूर्यमुखी खेती गरिएको ज्ञानकेन्द्रले जनाएको छ । कुनै समय घर आँगनका वरिपरि, करेसाबारीमा सोखका रूपमा लगाइने गरे पनि पछिल्लो समय भने कृषकले व्यावसायीक रूपमा खेती सुरु गरेका छन् । मौरी चरनका लागी सूर्यमुखी फूल उपयोगी ठानिने र यसबाट कृषकले तेब्बर फाइदा लिनसक्ने भएका कारणले व्यावसायिकरूपमा खेती गर्न थालेका हुन् ।

सौन्दर्यताका लागि केही बोट आँगनीको डिल, छेउछाउमा लगाउँदै आइए पनि यस खेतीबाट राम्रो आम्दानी लिने उद्देश्यले कृषकले अहिले व्यावसायिकरूपमा खेती गर्न थालेका छन् । ठूलो क्षेत्रमा खेती गरेको खण्डमा यसको बजार राम्रो रहेको पनि किसानको अनुभव छ । एक बालीबाट तेब्बर उब्जनी लिन सकिने हुँदा पनि यस क्षेत्रमा कृषकको आकर्षण बढेको छ । सूर्यमुखी फूलको उत्पादित बियाँबाट तेल उत्पादन गरी मनग्य आम्दानी लिन सकिन्छ भने डाँठलाई दाउराका रूपमा प्रयोग गर्न सकिन्छ ।

सूर्यमुखी फूललाई बाह्रै महिना फूलाउन सकिन्छ । फूलका कारण मौरीलाई चरन हुने र अर्कातर्फ बियाँबाट तेल आउने भएकाले व्यावसायिकतातर्फ कृषक लागेका हुन् । खेतबारी जहाँ पानी जाँदैन त्यहाँ यसको खेती गर्न सकिने र बाह्रै महिना फूल फूल्ने भएकाले यसको आम्दानी पनि राम्रै लिन सकिने अनुभव यहाँका किसानको छ । यहाँ अरु किसानले पनि मकै छाडेर सूर्यमुखी फूलको खेती गर्ने सोच बनाएका छन् ।

प्रतिक्रिया