बाँकेमा थप सात संक्रमितको मृत्यु

बाँके । कोरोना संक्रमणबाट बाँकेमा अहिलेसम्ममा ५८७ जनाको मृत्यु भएको छ । जिल्लाभित्रका २९५ र अन्य जिल्लाबाट आएका २९२ जनाको कोरोना संक्रमणबाट मृत्यु भएको बताइएको छ ।

जिल्लास्तरीय कोरोना संकट व्यवस्थापन केन्द्रका कोरोना स्रोत व्यक्ति तेज ओलीका अनुसार आज मात्रै बाँकेका विभिन्न अस्पतालमा उपचाररत थप सात कोरोना संक्रमितको मृत्यु भएको छ ।

सोमबार ५ः३० बजे साँझदेखि मङ्गलबार बिहान ८ बजेसम्म यी संक्रमितको मृत्यु भएको छ । ओलीका अनुसार मृतकमध्ये दुई–दुई जना बाँके र बर्दिया तथा कैलाली, सल्यान र रोल्पामा एक–एक गरी सात जना छन् ।

राजस्व संकलनमा १०९ प्रतिशत वृद्धि

बाँकेको नेपालगञ्ज भन्सार कार्यालयमा राजस्वमा वृद्धि हुँदा रु १७ अर्ब ८० करोड राजस्व संकलन भएको छ । कार्यालयका प्रमुख भन्सार अधिकृत जयबहादुर भण्डारीका अनुसार यस आर्थिक वर्ष २०७७–७८ मा सरकारले तोकेको लक्ष्य रु १८ अर्ब रहेको थियो ।

गत आव २०७६–७७ मा १४५ प्रतिशत राजस्व वृद्धि भई रु १५ अर्ब १८ करोड संकलन भएको थियो । गत वर्षको प्रगतिका आधारमा सरकारले यस वर्ष रु तीन अर्ब थप गर्ने लक्ष्य राखेको थियो । राजस्व संकलन गर्न जिम्मेवारी दिंदा आफूहरुलाई मन्त्रालय र विभागले तोकिएको लक्ष्य बाँकी डेढ महिनामा हासिल हुने भन्सार अधिकृत भण्डारीले बताए ।

उनका अनुसार यस वर्षको राजस्व संकलन वृद्धिदर हेर्दा १०९ प्रतिशतले हासिल भएको छ । सबैभन्दा बढी राजस्व संकलन हुने सीमा नाकाको रुपमा रहेको जेठ १५ गतेसम्म मात्रै रु एक अर्ब ६५ करोड राजस्व संकलन भएको छ । कोरोनाको प्रतिकूल समयमा पनि राजस्व चुहावट हुन नदिँदा राजस्वमा वृद्धि भएको उनको भनाइ छ ।

उनले भने, ‘अनुगमन पद्धतिलाई बलियो बनाएका छौँ, त्यसैले गर्दा राजस्व संकलन गर्न सफल भएको छौँ ।’ भारतीय सीमा नाका भएको हुनाले भारतबाट आयात हुने सबैभन्दा बढी औद्योगिक सामान, पेट्रोलियम पदार्थ, खाद्यान्नजस्ता सामग्री यही नाका हुँदै आयात हुने गर्दछ भने नेपालबाट जङ्गली जडीबुटीहरु, सुगन्धित तेलहरु निर्यात हुने गर्दछ ।