स्वदेशमै भविष्य खोज्दै युवा

कैलालीको टीकापुर नगरपालिका–१ एकतानगर शिविरका बलबहादुर टमट्टा रोजगारीका लागि ०७१ सालमा मलेशिया भएका हुन् । रोजगारी गरी दुई÷चार पैसा कमाउला भनेर गएका उनी त्यहाँ पुग्दा दलालको फन्दामा परे । त्यहाँ पुगेपछि उनले सुरुमा मासिक १८ हजारमा एक होटेलको काममा लागे । सोजेजस्तो नभए पनि नेपाल फर्किने उनीसँग कुनै उपाय थिएन । विमानस्थल पुग्ने बित्तिकै बलबहादुरको राहदानी दलालले आफ्नो हात पारिसकेको थियो । दुई वर्ष मलेशिया बसेका उनलाई विदेश जाँदा पाँच प्रतिशत ब्याजदरमा लिएको ऋण तिर्नै ठिक्क भयो ।

विदेशी भूमिमा पाउनसम्मको दुःख पाएर फर्किएका बलबहादुर अहिले स्वदेशमै अटो रिक्सा चलाएर आफ्नो भविष्य देख्न थालेका छन् । नेपाल आएर समूहबाट ऋण लिएर अटो रिक्सा चलाउन थादेका टमट्टा विदेशमा गर्ने दुःख नेपालमा गर्नसके दोब्बर पैसा कमाउन सकिने अनुभव सुनाउँछन् । ‘मैले दुःख के हो आँखा अगाडि देखिको छु । १० दिन लगाएर एक चट्टा गिट्टी कुटेर आठ सय रुपैयाँ कमाएर घर गुजारा गरेको मलाई अहिलेजस्तै लाग्छ,’ उनले मलेशियामा रहँदा आफूुले भोगेको दुःख सुनाए । ‘अटो रिक्सा चलाउन थालेपछि मलाई पछाडि फर्केर हेर्नुपरेको छैन । यो काममा सन्तुष्ट हुँदा जे काम गरे पनि आफ्नै देशमा गर्नुपर्ने रहेछ भन्ने ज्ञान मलाई विदेशले सिकाएको छ ।’ कोरोनाको जोखिमका कारण घटेको सर्वसाधारणको आवागमनले भने आफूले सोचेजति कमाइ गर्न नसकिरहेको उनले बताए ।

टीकापुर नगरपालिका–१ वनगाउँका हरिराम चौधरीको सोच पनि कम्ती छैन । ६ वर्षसम्म विदेशमा बसेर आएका उनले अब आफ्नै देशमा केही गर्नुपर्छ भन्ने अठोटसहित अटो रिक्सा चलाउन थालेका छन् । आफ्नै व्यवसायप्रति सन्तुष्ट भएका उनले भने, ‘अब विदेश जाने मेरो कुनै सोच छैन । जे गरे पनि आफ्नै देशमा गर्ने हो, हिजो अटो रिक्सामै राम्रो कमाइ थियो । आज छैन त भोलि त होला । अटो रिक्सानै मेरो व्यवसाय हो यसैलाई निरन्तरता दिन्छु ।’ उनी पनि आफ्नै भूमिमा बसेर सानो भए पनि काम गर्न पाएकोमा खुसी छन् । विदेशमा कमाइ भन्दा बढी दुःख र सास्ती हुने उनीहरूको अनुभव छ ।

उनले छिट्टै सम्पन्न भइहाल्नुपर्छ भन्ने मानसिकताले काममा सफलता पाउन कठिन हुने गरेको बताए । ‘व्यवसाय गर्दा छिट्टै ठूलो आम्दानी होस् भन्ने मानसिकता हामीमा छ । यस्तो मानसिकताले हामीले गर्ने कामबाट सफलता प्राप्त गर्न सक्दैनौँ, हरिरामले भने, ‘अहिले कोरोनाले सबै क्षेत्रको अवस्था नाजुक छ । हामीले पनि धैर्य राखेर भोलिको आशामा व्यवसायलाई निरन्तरता दिनुपर्छ ।’ एकैपटक कमाउन भन्ने मानसिकताले मान्छेले प्रगति गर्न नसक्ने उनको बुझाइ छ ।

जिल्लाकै लम्कीचुहा नगरपालिका–७ का अर्जुन चौधरी पहिले काम गर्न पोखरा, काठमाडौं लगायतका सहरमा जाने गर्थे । तर, कमाइ राम्रै भए पनि घर फर्किंदा भने रित्तै हात फर्किनुपर्ने बाध्यता हुने गरेको विगत उनले सुनाए । टाढा बसेर काम गर्दा कमाइसँगै खर्च पनि धेरै हुँदा वचत नहुने उनको अनुभव छ । एक वर्षदेखि अर्जुनले अटो रिक्सा चलाउँदै आएका छन् । संयुक्त परिवारमा बस्ने अर्जुनको थोरै कमाइले घरपरिवारमा गुजारा गर्न भने मुस्किल हुने गरेको छ ।

घरमा एक्लो व्यक्तिको कमाइले घरपरिवारको गुजारा गर्न समस्या हुन थालेपछि विदेश जाने तयारीमा लागेको उनी बताउँछन् । कोरोना भाइरस संक्रमण फैलनुभन्दा पहिले स्वदेशमै केही गर्नुपर्छ भन्ने सपना देखेका अर्जुनलाई कोरोनाका कारण व्यवसायबाट सोचेअनुसार आम्दानी हुन नसकेपछि भने विदेशको तयारी गर्नुपर्ने बाध्यता आइलागेको उनले बताए । उनी देश बाहिर गए अझै बढी कमाइ गर्न सकिन्छ कि भन्नेमा छन् ।

‘कोरोना संक्रमण हुने जोखिमले व्यवसायमा नराम्रो असर पर्दा घर गुजारा पनि नहुने अवस्थामा आएको छ,’ उनले भने, ‘व्यवसाय गर्दा भएको आम्दानीले गाडीको किस्ता, घरको गुजारा चलाउन मुस्किल भयो, अरू केही काम गरौँभन्दा पुँजीको समस्या छ, कोरोना संक्रमण कम हुनासाथ विदेशको राहदानी लगाउने तयारी गरिरहेको छु ।’

टीकापुर नगरपालिका–२ राजीपुरका मोहन ठकुल्ला पनि ६ वर्ष विदेश बसेर स्वदेश फर्किए । विदेशमा पनि राम्रो कमाइ गरेका मोहनले आफ्नै देशमा केही गर्नुपर्छ भन्ने अठोटका साथ अटो रिक्सा किने । घरपरिवारको आन्तरिक समस्याका कारणले पनि उनले विदेशको सपना भुलिसकेका छन् । अटो रिक्सा किन्दा दैनिक १ हजार ५ सयसम्म वचत हुन थालेपछि आफू विदेश गएर फसेको रहेछु भन्ने लागेको उनले बताए । अहिले उनी अटोको कमाइले सन्तुष्ट छन् ।

कोरोनाको जोखिमका कारण व्यवसायमा परेको असरले अटो रिक्साचालक मारमा परेको अनुभव सुनाउँदै उनले भने, ‘कोरोनाले सबै व्यवसायको अवस्था नाजुक बनाएको छ । अहिले ग्राहकसँग पनि तोकिएको भाडा पाउन सकिने अवस्था छैन, जुन उमंग पहिले थियो, त्यो रहेन । कतिपय मजदूरले फेरि विदेशको सपना देख्न थालेका छन् ।’ उनले आफू नजिकका साथीभाइको अनुभूति सुनाए ।

कोरोनाको जोखिमका कारण पछिल्ला महिनामा अटो रिक्सा चालकमा परेको असरले सोचेअनुसार आम्दानी हुन नसकेपछि टीकापुर, लम्की र आसपासका सडकमा रिक्सा चलाउने कतिपय मजदुर पुनः विदेशिने तयारी गरिरहँदा अन्य कतिपयले भने जे जस्तो अवस्था भए पनि अब आफ्नै देशमा काम गरेर जीविका चलाउने अठोटमा देखिन्छन् । सडकको अवस्था जीर्ण भएकाले पनि रिक्सा चलाएर जीविका चलाउने मजदूरलाई सहजरूपमा व्यवसाय गर्न कठिनाइ देखिन्छ । ‘ठाउँठाउँमा बिग्रेको सडकको अवस्थामा सुधार नआउँदा सहजरूपमा व्यवसाय गर्न पनि समस्या भइरहेको छ,’ अर्का अटो रिक्साचालक जनक टमट्टाले भने, ‘ग्राभेल र खाल्टाखुल्टी परेको सडक भएकाले रिक्सा बिग्रने गर्छ, यात्रु पाइँदैन, पाए पनि सस्तोमा जान खोज्छन् ।’ कैलाली जिल्लाको दक्षिण पूर्वी सहर टीकापुर नगरपालिका क्षेत्रमा सयभन्दा बढी अटो रिक्सा चल्ने गरेका छन् । गरी खान चाहे अनुसार यहाँको वातावरण पनि राम्रो हुनुपर्ने उनको भनाइ छ ।

सामान्य लेखपढ गरेका, दैनिक ज्यालादारी गरेर गुजारा गर्दै आएका युवाको स्वरोजगारको मुख्य स्रोत नै अटो रिक्सा व्यवसाय बन्दा कोरोनाको जोखिमले पुगेको असरले भने उनीहरूको आम्दानीमा असर पुगिरहेको छ । सबै रिक्सा चालकसँग लाइसेन्स (चालक अनुमतिपत्र) समेत नहुँदा पनि बेलाबखत विभिन्न खालको हैरानी खेप्नुपरेको उनीहरूको गुनासो छ । यसका लागि सरकारी निकायले पनि नेपालमा नै गरी खान चाहने युवालाई प्रोतसान गर्नुपर्ने उनीहरूको माग छ ।

चालक अनुमतिपत्रविना नै रिक्सा चलाएर हुनसक्ने कुनै दुर्घटनाबाट पुग्ने सम्पूर्ण क्षतिपूर्ति सम्बन्धित अटो चालकले नै बेहोर्नुपर्ने बाध्यता आफूहरूको रहेको ती मजदूरको गुनासो छ । लेखपढ गर्न नसक्ने यो व्यवसायमा लागेको अवस्थामा चालक अनुमतिपत्र लिँदा लिइने लिखित परीक्षा र ‘ट्रायल‘ परीक्षा लिँदा तोकिएको मापदण्ड पूरा गर्न नसक्दा लाइसेन्स पाउन आफूहरूका लागि फलामको च्युरा चपाउनुसरह बनेको गुनासो मजदुरको छ । यस्ता समस्यालाई व्यावहारिक रूपमा हेरी दिन उनीहरूको आग्रह छ ।

यसबाहेक रिक्सा कुन सडकमा चलाउन पाउने, कुनमा नपाउने भन्ने विषयमा रिक्सा चालकलाई रुट परमिट (सडक इजाजत) उपलब्ध गराउने व्यवस्था नहुँदा पनि उनीहरूले समस्या झेल्ने गरेका छन् । यसमा आफूहरूलाई समस्या रहेको उनीहरूको गुनासो छ, ‘बर्दिया जिल्लाबाट रुट परमिट पाएका आटोचालक कैलालीको लम्कीसम्म सहजरूपमा पुग्छन्, तर हामीलाई आफ्नै जिल्लामा रुट परमिट पाउन कठिन छ ।’ उनीहरूले गुनासो सुनाए । यस्ता समस्याले काम गर्नेको मनोबल घटने उनीहरू ठान्द छन् । यसमा सरकारी निकायले समन्वय गर्नुपर्ने उनीहरूको माग छ ।

प्रतिक्रिया