नेपालको च्याम्पियन हुने लक्ष्य

काठमाडौं । नेपाली राष्ट्रिय क्रिकेट टोलीले आइसिसी ट्वान्टी ट्वान्टी विश्वकपका लागि एसियाली छनोट च्याम्पियन हुने लक्ष्य लिएको छ । पाँच टोली सम्मिलित प्रतियोगिता सिंगापुरमा हुँदैछ । यस प्रतियोगिताको विजेता टोली युएईमा हुने ग्लोबल छनोटका लागि योग्य हुनेछ । ग्लोबल छनोट अक्टोबर ११ देखि नोभेम्बर ३ सम्म आयोजना हुनेछ ।

राष्ट्रिय खेलकुद परिषदका सदस्य सचिव रमेश सिलवालले नेपाली टोलीलाई शुभकामनासहित बिदाई गरे । बिदाई कार्यक्रममा सदस्यसचिवले क्रिकेट विवाद छिट्टै समाधान गरी आईसीसीको निलम्बन फुकुवा गर्ने प्रतिबद्धता व्यक्त गरेका छन् । १४ सदस्यीय नेपाली टोली मंगलबारै मलेसिया जानेछ । नेपालले मलेसियाको सिनियर टोलीसँग जुलाइ १२ र १४ मा दुई अन्तर्राट्रिय ट्वान्टी २० क्रिकेटको शृंखला खेल्नेछ । त्यसपछि टोली सिंगापुर जान लागेको हो ।

कप्तान पारस खड्काले प्रतियोगितामा कमजोर बरियताका टोलीहरू रहे पनि आफूले शतप्रतिशत प्रदर्शनको प्रयास गर्ने बताए । प्रतिस्पर्धीलाई कमजोर नआँक्ने भन्दै उनले राम्रो क्रिकेट खेल्ने बताए । प्रशिक्षक उमेश पटवालले पनि टिमको तयारी राम्रो भएको र उपाधि दावेदारको हैसियदमा प्रदर्शन हुने बताए ।

उनले मलेसियासँगको शृंखलाले पनि टिमको तयारीमा सकारात्मक नतिजा आउने बताए । एसिया छनोटमा नेपालसँगै सिंगापुर, कुवेत, मलेसिया र कतार छन् । नेपालले पहिलो खेल जुलाई २३ मा कतार, जुलाई २४ मा मलेसिया, जुलाई २७ मा कुवेत र जुलाई २८ मा सिंगापुरबिरूद्ध प्रतिस्पर्धा गर्नेछ ।

नेपाली टोलीमा पारस खड्का(कप्तान), ज्ञानेन्द्र मल्ल, शरद भेषावकर, वसन्त रेग्मी, विनोद भण्डारी, सोमपाल कामी, करण केसी, प्रदीप ऐरी, सन्दीप लामिछाने, दीपेन्द्रसिंह ऐरी, ललितनारायण राजवंशी, अविनाश बोहरा, रोहितकुमार पौडेल र पवन सर्राफ छन् । वैकल्पिक खेलाडी कुशल भुर्तेल, जितेन्द्रकुमार मुखिया, सुसन भारी र आरिफ शेख रहेका छन् ।