नेपालको फराकिलो जित

काठमाडौं । एसीसी यू–१९ इस्टर्न रिजन क्रिकेटमा नेपालले चीनलाई १० विकेटले पराजित गरेको छ । टस हारेर पहिला ब्याटिङ गरेको चीनले २३ दशमलव १ ओभरमा सबै विकेट गुमाएर ५३ रन बनाएको थियो । चीनलाई सस्तैमा समेट्न नेपालका सागर ढकालले ६ विकेट लिए । ९ दशमलव १ ओभर बलिङ गरेका सागरले ३ ओभर मेडन राख्दै १९ रन खर्चिएर ६विकेट लिएका हुन् । यसैगरी ७ ओभर बलिङ गरेका तीलकराज भण्डारीले ३ ओभर मेडन राख्दै १५ रन खर्चिएर ३ विकेट लिए ।

कमलसिंह ऐरीको नाममा १ विकेट रह्यो । चीनका गुहावो गो र लिङ चेनले समान १३–१३ रन बनाए पनि अरु ब्याट्सम्यानले व्यक्तिगतरूपमा अधिकतम ५ रन पनि जोड्न सकेनन् । नेपालले अतिरिक्त ७ रन दिन पुग्यो । ५४ रनको सामान्य लक्ष्य नेपालले ५ ओभरमा कुनै पनि विकेट नगुमाइ पूरा गरेको थियो । नेपालको जितमा पवन शर्राफ र रित गौतमले नट आउट पारि खेले ।

पवनले पाँचाँै ओभरमा २ छक्का र २ चौकाको मद्दतले २१ रन जोडेपछि नेपा सहजै विजयी भयो । समग्रमा पवन ४६ रनमा नट आउट रहँदा रित गौतम १० रनमा नट आउट रहे । बुधबार पनि पराजित भएको चीन दुवै खेल गुमाउँदै प्रतियोगिताबाट बाहिरिएको छ । यो समूहबाट नेपाल र सिंगापुर सेमिफाइनलमा पुगेका छन् । सेमिफाइनलमा समूह विजेता र उप विजेताको टुंगो नेपाल र सिंगापुरबीचको खेलको नतिजाले तय हुनेछ ।