‘सत्या’ को ट्रेलर

काठमाडौं । मिलन आलेमगरको निर्देशन रहेको नयाँ चलचित्र ‘सत्या’ को ट्रेलर सार्वजनिक गरिएको छ । आगामी २२ कात्तिकमा देशव्यापी प्रदर्शन मिति घोषणासहित चलचित्रको ट्रेलर र फस्टलुक्स राजधानीमा एक समारोहबीच रिलिज गरिएको हो । चलचित्र प्रदर्शन हुनुभन्दा चार महिनाअघि नै यो ‘सत्या’ को ट्रेलर सार्वजनिक गरिएको निर्माण पक्षले जनाएको छ ।

चलचित्रका अभिनेता विकास थापाको जन्मदिनको अवसर पारेर फस्टलुक्स र ट्रेलर रिलिज गरिएको हो । ट्रेलर अनुसार यो चलचित्र एक्सन प्रधान बनेको छ । चलचित्रको ट्रेलरमा प्रेम, रोमान्स र द्वन्द्वलाई देखाइएको छ । आफ्नो चलचित्र अहिलेका समसामयिक सत्य घटनामा आधारित रहेको निर्देशक मगरले दाबी गरे ।

चलचित्रमा रामजी लामिछाने, सुरेश पाण्डे र सुरेश बस्यालको कोरियोग्राफी छ । झम्कीदेवी कालाखेती, सुमन खत्री र करण सिंह बोहोरा निर्माता रहेको चलचित्रमा मदन थिङ कार्यकारी निर्मातामा छन् । त्यस्तै, चलचित्रमा विकास थापासँगै राज कालाखेती, प्रिया शर्मा, करणसिंह बोहोरा, वर्षा थिङ, सुमन खत्री, विकास थापा, गौरव सम्राट लगायतका कलाकारको अभिनय छ । यो चलचित्रमा विकास चौधरीको संगीत, सुमनकुमार तण्डुकारको छायांकन, तारा थापा ‘किम्भे’ को सम्पादन, श्रवण सम्राटको कथा र देव महर्जनको द्वन्द्व रहेको छ ।