खोजखबर

‘जापानी लगानीकर्तालाई नेपाल आउन अनुरोध’

सौर्य अनलाइन २०७५ मंसिर ५ गते ६:४८ मा प्रकाशित

काठमाडौं । नेपालका एकजना वरिष्ठ कूटनीतिक व्यक्तित्वले जापानी उद्यमी–व्यवसायी तथा लगानीकर्तालाई आफ्नो देशमा पूँजी परिचालन गर्न अनुरोध गरेका छन ।

टोकियोस्थित नेपाली दूतावास, जापान बाह्य व्यापार सङ्गठन तथा संयुक्त राष्ट्रसङ्घीय औद्योगिक विकास सङ्गठनले संयुक्तरुपमा जापानको राजधानी टोकियोमा आयोजना गरेको ‘नेपाल लगानी’ कार्यशालामा जापानी व्यापारीलाई नेपाल आउन अनुरोध गरेका हुन ।

आफ्ना जापानी समकक्षीको निमन्त्रणामा जापान भ्रमणमा रहेका परराष्ट्रमन्त्री प्रदीपकुमार ज्ञवालीले कार्यशालामा नेपालको पछिल्लो राजनीतिक विकास तथा नेपाल सरकारले निर्धारण गरेका प्राथमिकताका क्षेत्रबारे जानकारी दिनुभएको परराष्ट्र मन्त्रालयले जनाएको छ ।

वैदेशिक लगानी आकर्षित गर्न नेपाल सरकारले अवलम्बन गरेका नीति तथा कार्यक्रमबारे प्रष्ट पार्दै उनले कृषिको आधुनिकीकरण, जलविद्युत उत्पादन, भौतिक पूर्वाधार निर्माण, सूचना तथा सञ्चार प्रविधि, पर्यटन तथा सेवा क्षेत्रमा लगानी गर्न जापानीहरूलाई आग्रह गरे ।

मन्त्री ज्ञवालीले जापानका पर्यटन व्यवसायीलाई नेपालका पर्यटन क्षेत्र र पर्यटकीय गन्तव्यबारे प्रचारप्रसार गर्न तथा जापानी नागरिकलाई नेपाल भ्रमणका निम्ति प्रेरित गर्न पनि आग्रह गरे । लगानी बोर्ड नेपालका प्रमुख कार्यकारी अधिकृत महाप्रसाद अधिकारीले प्रत्यक्ष वैदेशिक लगानी भित्र्याउन नेपाल सरकारले जारी गरेका लगानीमैत्री नीति, ऐनकानून तथा लगानी प्रक्रियासम्बन्धी विस्तृत जानकारी दिए ।

प्रतिक्रिया

पछिल्ला अपडेट्स

लोकप्रिय