बन्दिपुरमा पर्यटन तथा सांस्कृतिक महोत्सव

दमौली । तनहुँको पर्यटकीय नगरी बन्दिपुरमा शुक्रबारदेखि तनहुँ पर्यटन तथा सांस्कृतिक महोत्सव एवं बन्दिपुर भेटघाट कार्यक्रम सुरु भएको छ ।

बन्दिपुर गाउँपालिका, बन्दिपुर युनेस्को क्लब, रोट¥याक्ट क्लब अफ दमौली र ड्याप्स नेपालको आयोजनामा सुरु भएको महोत्सवको उद्घाटन तनहुँ निर्वाचन क्षेत्र–१ का प्रतिनिधिसभाका सदस्य कृष्णकुमार श्रेष्ठले गरे । सो अवसरमा उनले तनहुँको पर्यटकीयस्थल एवं संस्कृतिको संरक्षण एवं प्रवद्र्धन गर्न महोत्सव फलदायी हुने बताए ।

बन्दिपुरलाई केन्द्रमा राखेर समग्र तनहुँकै सांस्कृतिक परम्पराको उजागर गर्नका लागि आयोजित महोत्सवले संस्कृतिको जगेर्ना हुनुका साथै पर्यटकीय स्थलको प्रचार प्रसार गर्नसमेत मद्दत पुग्ने सांसद श्रेष्ठले बताए । सन् २०२० सम्ममा २० लाख विदेशी पर्यटक नेपाल भित्र्याउने लक्ष्यका साथ घोषणा गरिएको नेपाल भ्रमण वर्षलाई जिल्लास्तरमा हुने यस्ता मेला महोत्सवले सहयोग गर्ने विश्वास व्यक्त गरे ।

कार्यक्रममा प्रदेशसभा सदस्य डोवाटे विकले विभिन्न जातजातिको भाषा, संस्कृति संरक्षण र सम्बद्र्धनका लागि महोत्सवले टेवा पु¥याउने बताए । जिल्ला समन्वय समितिका प्रमुख शान्तिरमण वाग्ले, प्रमुख जिल्ला अधिकारी भरतकुमार शर्मा र बन्दिपुर गाउँपालिकाका अध्यक्ष पूर्णसिंह थापाले बन्दिपुरको पर्यटन र संस्कृति प्रवद्र्धन गर्ने महोत्सवको मुख्य उद्देश्य रहेको बताए ।

महोत्सव उद्घाटनका अवसरमा नेवार समुदायको लाखे नाच, डोको नाच, मगर समुदायको कौरा नृत्य, चेपाङ समुदायको ढ्यांगो नाचलगायतका सांस्कृतिक नृत्य प्रस्तुत गरिएको थियो । शनिबारसम्म चल्ने महोत्सवमा राष्ट्रिय तथा स्थानीय कलाकारले प्रस्तुति दिनेछन् ।

प्रतिक्रिया