बेवारिसे बालिकाको उद्धार

बैतडी, १९ पुस । प्रहरीले बैतडीको दोगडाकेदार गाउँपालिका–३ श्रीकोटबाट मंगलबार एक बेवारिसे बालिकाको उद्धार गरेको छ ।

मानसिक सन्तुलन गुमाएकी गीता भट्ट नाम बताउने अन्दाजी १५ वर्षीया बालिकाको उद्धार गरिएको खोचलेक प्रहरी चौकीका इञ्चार्ज प्रहरी सहायक निरीक्षक श्यामसिंह महराले जानकारी दिए ।

महाकाली राजमार्गअन्तर्गत खोचलेक बजार नजिकै भेट्टिएकी बालिकाको मानसिक सन्तुलन ठीक छैन, प्रहरी सहायक निरीक्षक महराले भने, “कपडा च्यातिएको अवस्थामा छ, आफ्नो नाम ठेगानासमेत एकिन बताइनन् ।”

“कुनै बेला महेन्द्रनगर घर बताउँछिन्, कुनै बेला दार्चुला” उनले भने, “नाम, ठेगाना सोध्दा हाँस्ने मात्रै गर्छिन् ।”

उद्धार गरिएकी बालिकालाई महिला तथा बालबालिका कार्यालय बैतडीको सेफ हाउस, पाटनमा राखिएको जिल्ला प्रहरी कार्यालय बैतडीका निमित्त प्रहरी प्रमुख, प्रहरी निरीक्षक कमल विष्टले जानकारी दिए ।

उनले भने, “बेवारिसे भेट्टिएकी बालिकाको सुरक्षाका लागि सेफ हाउसमा राखेको र बालिकाको घरपरिवार सम्पर्कमा आएपछि घरपरिवारको जिम्मा लगाउँछौँ ।”

प्रतिक्रिया