धर्मशाला, १ चैत । बंगलादेश भारतमा जारी टी–ट्वान्टी विश्वकप क्रिकेटको सुपर टेनमा प्रवेश गरेको छ । ओमानलाई हराउँदै बगंलादेशले अन्तिम १० मा स्थान बनाएको हो । समूह ‘ए’अन्तर्गतको अन्तिम लिग खेलमा आइतबार बंगलादेशले ओमानलाई ५४ रनले हरायो । पहिले ब्याटिङ गरेको बंगलादेशले निर्धारित २० ओभरमा २ विकेटको क्षतिमा १ सय ८० रन बनायो । जवाफमा ओमान ब्याटिङमा उत्रदा २ पटकसम्म वर्षाका कारण खेल अवरुद्ध भयो । जसको कारण डर्कलुइस मेथडको आधारमा ओमानले १२ ओभरमा १ सय २० रनको चुनौति पायो । तर, उसले ९ विकेटको क्षतिमा ६५ रन मात्रै जोडेपछि हार बेहो¥यो ।
यसअघि बंगलादेशका लागि तमिम इकबालले सर्वाधिक १ सय ३ रनको शतकीय पारीको योगदान दिए । उनले ६३ बलमा आक्रमक ब्याटिङ गर्दै १० चौका र ५ छक्का प्रहार गरे । शबिर रहमान(४४), शकिब अल हसन अविजित(१७) र सौम्य सरकारले(१२)रन जोडे । ओमानको बलिङतर्फ एजे लाल्चेताले १ विकेट लिए । ओमानको लागि बिलाल खान मात्रै किफायती सावित भए । उनले ४ ओभर बलिङ गर्दै १६ रन मात्र खर्चे । जवाफमा ओमानले वर्षाको कारण १२ ओभरमा १ सय २० रनको नयाँ चुनौति पाएको थियो । तथापि ओमानले ९ विकेट गुमाएर ६५ रन मात्रै जोड्यो । पहिलो ओभरको दोस्रो बलमा नै विकेट गुमाएको ओमानको सुरुआत राम्रो हुन सकेन । उसका लागि जतिन्दर शिंह(२५) र एडनान एलियसले (१३) रन जोडे । अन्य कुनै पनि ब्याट्सम्यानले दोहोरो अंकमा रन जोड्न सकेनन् । यसअघि नै अफगानिस्तानले समूह चरण पार गर्दै सुपर टेनको स्थान पक्का गरिसकेको छ । मगंलबारदेखि सुपर टेनका खेलहरू सुरु हुँदै छन् । पहिलो खेलमा आयोजक भारत र न्युजिल्यान्ड भिड्नेछन् ।
प्रतिक्रिया