यिनले राष्ट्रको सम्मान पाउलान् ?

काठमाडौं, १५ फागुन । बिहीबार कालिकोटमा भएको एयर काष्ठमण्डपको जहाज दुर्घटनामा निधन भएका पाइलट दिनेश न्यौपाने र को–पाइलट सन्तोष रानाको शव शनिबार शिक्षण अस्पताल काठमाडौं ल्याइयो । हेलिकप्टरबाट त्रिभुवन विमानस्थलसम्म ल्याइएका उनीहरूको शव पोष्टमार्टमका लागि शिक्षण अस्पताल लगिएको हो । आफ्नो ज्यान गुमाएर यात्रुको ज्यान बचाएका चालकद्वयप्रति मृत्युपर्यन्त देशविदेशका नेपालीले सम्मान व्यक्त गरिरहेका छन् ।

शिक्षण अस्पतालमा छोराको शव बोकेको एम्बुलेन्स रोकिन नपाउँदै को–पाइलट सन्तोष रानाकी आमा यमकुमारीको भक्कानो छुट्यो । एम्बुलेन्सभित्रै छिरेर छोराको शव समातेर यमकुमारी डाँको छोडेर रुँदा माहोल शोकमा डुब्यो । केहीबेरमै यमकुमारी छोराको शवको आडैमा अचेत भएर ढलिन् ।

छोरा गुमाएको पीडामाथि पूर्वमन्त्री एवं एमाले नेता दलबहादुर रानालाई अचेत पत्नी सम्हाल्ने दोहोरो भार थपियो । पूर्वमन्त्री रानाको हाउभाउले संकेत गर्दै थियो उनलाई आफैँ सम्हालिन कति हम्मे परेको होला । त्यहाँ जुटेका अफन्तले ढलेकी आमालाई छोराको शव बोकेकै एम्बुलेन्समा राखेर अस्पताल दौडाए ।

शिक्षण अस्पतालमा पाइलट दिनेश न्यौपानेका परिवारको अवस्था उस्तै थियो । न्यौपानेका परिवारजन र आफन्तको रुवाईले अस्पतालको आँगन शोकमग्न बन्यो ।

मृतक पाइलटद्वयका परिवार र आफन्तलाई सान्त्वना दिने त्यहाँ थुप्रै सर्वसाधारण थिए । उनीहरू भनिरहेका थिए, ‘आफूलाई सम्हाल्नुस्, यस्ता बहादुर सपुत सबैको भाग्यमा हुँदैन ।’ अस्पतालको आँगामा चालकद्वयप्रति सम्मानका स्वर सुनिन्थ्यो, ‘आफ्नो प्राण त्यागेर यात्रु बचाउने यस्ता पाइलटलाई सरकारले राष्ट्रिय सम्मान दिनुपर्छ ।’