अर्थबजार

माथिल्लो सेती जलविद्यत् ऋण सहमती

सौर्य अनलाइन २०७० वैशाख १० गते २३:१६ मा प्रकाशित

काठमाडौं, ११ वैशाख । एसियाली विकास बैक (एडिबी) र अर्थ मन्त्रालयबीच १ सय ४० मेगावाटको माथिल्लो सेती जलविद्युत् परियोजना निर्माणका लागि १ सय ५० मिलियन डलर ऋण दिने सहमति भएको छ ।

अर्थ मन्त्रालय र एडिबीबीच ऋण सम्झौतापत्रमा हस्ताक्षर भएको हो । सम्झौतापत्रमा अर्थसचिव शान्तराज सुवेदी र एडिबीका देशीय निर्देशक केनेची योकोहामाले हस्ताक्षर गरेका छन् ।
गत फागुन अन्तिम साता जापानी अन्तर्राष्ट्रिय सहयोग नियोग (जाइका) र अर्थ मन्त्रालयबीच १४ अर्ब रुपियाँ बराबरको ऋणपत्रमा सम्झौता भएको थियो । तनहुँ हाइड्रो पावर कम्पनीद्वारा निर्माण हुने आयोजनाको कुल लागत ५ सय ५ मिलियन डलर हो । आयोजनाका लागि युरोपियन इभेस्ट फन्डले ७० मिलियन डलर र अबुदाबी फन्डले ३० मिलियन डलर ऋण दिन सहमत भए पनि ऋण सम्झौतापत्रमा हस्ताक्षर हुन बाँकी गरेको आयोजनाका निर्देशक महेश आचार्यले जानकारी दिए ।
एडिबीको २५ लाख अमेरिकी डलर बराबरको प्राविधिक सहयोग र प्राधिकरणको लगानीमा आयोजनाको विस्तृत परियोजना प्रतिवेदन
(डिपिआर) निर्माण कार्य भइरहेको छ भने जाइकाको सहयोगमा सम्भाव्यता अध्ययन भएको थियो । सन् २०१४ भित्रै निर्माण सुरु गरेर ६ वर्षभित्र परियोजना निर्माण सम्पन्न गर्ने लक्ष्य राखिएको छ । निर्देशक आचार्यका अनुसार, करिब डेढ वर्षपछि आयोजनाको निर्माण कार्य सुरु हुनेछ । आयोजनाबाट तनहुँका आठ गाविस प्रभावित हुने तथा करिब ४५ घर मात्र विस्थापित हुने परियोजनाले जनाएको छ ।

प्रतिक्रिया

पछिल्ला अपडेट्स

लोकप्रिय