व्यापारीलाई प्रहरीबाटै गोली प्रहार

काठमाडौं, २७ कात्तिक । काठमाडौंको तीनकुनेमा ट्याङकर सञ्चालक रेयाजुल अन्सारीलाई अज्ञात समूहले गोली प्रहार गरेर हत्याको प्रयास गरेको छ ।
ना. ३ ख ६९२४ नम्बरको हवाई ईन्धन बोक्ने ट्याङकरका धनी बारा जिल्ला जितपुर–३ घर भएका ३० वर्षीय अन्सारीलाई आज विहान पाँच बजेट अज्ञात समूहले गोली प्रहार गरेको प्रहरीले जनाएको छ ।
अन्सारीसँगै, ट्याङकर चालक कन्चनपुरका शेख मजिबुर रहमान र प्रहरी कर्मचारी सुरेन्द्र चौधरीसँगै सुतेको अवस्थामा उनीमाथि गोली प्रहार भएको थियो । सँगै सुतेका प्रहरी जवान चौधरी फरार रहेकाले उनले अन्सारीलाई गोली प्रहार गरेको अनुमान प्रहरीले गरेको छ । प्रहरी जवान चौधरीको खोजी कार्यजारी रहेको छ ।
अन्सारीलाई बाँया कुमको पछाडिबाट गोली लागेको छ । घाइते अन्सारीलाई उनका साथी मदन खरेलले मेडिकेयर अस्पतालमा उपचारका लागि भर्ना गरेका थिए ।
उनलाई थप उपचारका लागि मनमोहन कार्डियोलोजी बिभाग शिक्षण अस्पताल महाराजगञ्जमा पुनः भर्ना गरिएको छ ।