एमाओवादीविरुद्ध खनिए कांग्रेसका शीर्ष नेता

काठमाडौं, २५ कातिक । नेपाली कांग्रेसका शीर्ष नेताहरूले एमाओवादी सर्वसत्तावादी बाटोमा लागेको आरोप लगाउँदै तीव्र विरोध गरेका छन् । शुक्रबार आयोजित सभालाई सम्बोधन गर्दै कांग्रेसका शीर्ष नेताहरूले एमाओवादीले सत्ताकब्जाको बाटो नत्यागे पतन हुने चेतावनी दिए ।
गणेशमान सिंहको ९७आँै जन्मजयन्तीको अवसरका गरिएको सभामा बोल्ने सबै शीर्ष नेता एमाओवादीविरुद्ध खनिएका थिए । सभालाई सम्बोधन गर्दै सभापति सुशील कोइरालाले प्रधानमन्त्री डा. बाबुराम भट्टराईले सहमतिका लागि कुर्सी नछाडे राजाको जस्तै हालत बनाइदिने चेतावनी दिए । ‘शालीनतासाथ कुर्सी छाडेर राजनीतिक सहमतिका लागि मार्गप्रशस्त गर्नुस्,’ उनले भने, ‘अन्यथा यस्तै अवस्था कायम भए राणा, पञ्चायत र राजाजस्तै पतन हुनुहुन्छ ।’ कोइरालाले एमाओवादी शान्ति, संविधान र लोकतन्त्रको बाधक भएको पनि दाबी गरे । ‘शान्ति, संविधान र लोकतन्त्रका लागि तपाईंहरू अवरोध गरिरहनुभएको,’ सभापति कोइरालाले भने, ‘डर, धाकले अब कोही डराउँदैन । लोकतन्त्रका मूलधारमा उभिनुस्, आºनो कुरा राख्नुस् अब करकापले राजनीति चल्दैन ।’ उनले कांग्रेस चुनावमा जान तयार रहेको भन्दै चुनावका लागि वातावरण बनाउन आग्रह गरे । ‘चुनावका निम्ति बाटो स्पष्ट गर्नुस् । हामी चुनावमा जान चाहन्छौँ,’ कोइरालाले भने, ‘सत्ता कब्जाको बाटो त्याग्नुस् त्यो बाटो पतनको बाटो हुनेछ,’ उनले भने ।
सभापति कोइरालाले मुलुकको अवस्थाप्रति कांग्रेस जिम्मेवार रहेको भन्दै आन्दोलनको विकल्प मात्रै नरोजेको प्रस्ट्याए । ‘एउटै कुरा आन्दोलन मात्रै त्यो उचित होइन,’ कोइरालाले भने, ‘हामी सहमतिका लागि पनि तत्पर छौँ ।’ संवैधानिक लडाइँ, शान्तिपूर्ण आन्दोलन र सहमतिको प्रयासलाई कांग्रेसले एकैपटक अघि बढाएको उनको प्रस्टोक्ति थियो । कतिपयले वार्ता छाडी आन्दोलनमा मात्रै जानुपर्ने बताएको उल्लेख गर्दै कोइरालाले सहमतिका लागि वार्ताका ढोका बन्द नगर्ने बताए । कोइराला अघि भाषण गर्दै देउवाले आन्दोलनमा जाने भए प्रस्ट हुनुपर्ने बताएका थिए । सभापति कोइरालाले विपक्षीहरूको विरोधको शैलीलाई रिहर्सल मात्रै भएको दाबी गर्दै शनिबार १८/२० दल मिलेर शान्तिपूर्ण आन्दोलनका कार्यक्रम तयार पार्ने जनाए ।
‘आन्दोलनमा जाने भए प्रस्ट होऔँ’
वरिष्ठ नेता शेरबहादुर देउवाले माओवादीले सत्ता कब्जा र सर्वसत्तावाद लाद्न लागेको उल्लेख गर्दै आन्दोलनबारे कांग्रेस प्रस्ट हुनुपर्ने बताए । ‘सरेन्डर वा आन्दोलन दुईवटा बाटा मात्रै छन् । यसका लागि कांग्रेस प्रस्ट हुनुपर्छ,’ उनले भने । पार्टीमै आन्दोलनमा जाने कि नजाने भन्नेमा द्विविधा रहेको पनि उनले खुलासा गरे । ‘आन्दोलन गर्ने हो कि होइन भन्ने कुरा भइरहेको सुन्छु म । आन्दोलनको घोषणा मुखले मात्र भनेर हुँदैन कामले गरेर देखाउनुपर्छ,’ उनले भने ।
नेता देउवाले संविधान बनाउनकै लागि नयाँ चुनाव गर्नु र पुन:स्थापना गरी संविधान बनाउनमा आफूले कुनै अन्तर नदेखेको पनि बताए । पुन:स्थापनाको कुरा उठाउँदा भत्ता खान खोजेको भन्ने आरोप लगाएको उनको भनाइ थियो । देउवाले गणेशमान सिंहले राणा, पञ्चायत र राजाविरुद्ध लडेर नेपाली राजनीतिलाई एउटा उचाइ दिएको भन्दै उनको योगदानको चर्चा गरे ।
‘सरकारकै कारण पूर्वराजाले माइक समाते’
उपसभापति रामचन्द्र पौडेलले सबैभन्दा ठूलो बाधा माओवादी र मधेसवादीको सत्ता रहेको भन्दै आन्दोलनबाटै परास्त गर्नुपर्ने बताए । संविधानसभामा लोकतन्त्र विरोधीहरूको बहुमत भएकाले नै संविधान नबन्दै संविधानसभा अन्त्य भएको उनको आरोप थियो । ‘संविधानसभा लोकतन्त्र विरोधीहरूको बहुमत भएकाले संविधान बन्न सकेन,’ पौडेलले भने, ‘माओवादीले लोकतन्त्र र शान्तिलाई विश्वास गरेन । यही हिंसा रोज्ने पार्टी संविधानसभामा ठूलो पार्टी भएकाले संविधानसभा असफल भयो ।’ मुलुकलाई अधिनायकवाद र षड्यन्त्रमा पुर्‍याएका माओवादी र मधेसवादी चुनावमा जान तयार नभएको उनको आरोप थियो । चुनाव गराउने र संविधान बनाउने सरकारको सोच नभएको भन्दै पौडेलले सरकारकै यस्तै प्रवृत्तिले पूर्वराजावादीहरू सल्बलाएको आरोप लगाए । यही सत्ताका कारण पूर्वराजा ज्ञानेन्द्रले माइक समातेर भाषण गर्न थालेको उनको आरोप थियो ।
सभालाई कांग्रेसका महामन्त्रीद्वय प्रकाशमान सिंह, कृष्णप्रसाद सिटौला, कोषाध्यक्ष चित्रलेखा यादव, नेता भीमबहादुर तामाङलगायतले सम्बोधन गरेका थिए । शान्तिबाटिकामा रहेको गणेशमान सिंहको सालिकमा माल्यार्पण गरी र्‍यालीसहित वसन्तपुरमा पुगी सभामा परिणत भएको थियो । २००७ र ०४६ सालको परिवर्तनमा महत्त्वपूर्ण योगदान गरेका सिंहको सालिकमा कांग्रेसका शीर्षस्थ नेताहरूले माल्यार्पण गरेका थिए ।