अवैध काठसहित दुई पक्राउ

ताप्लेजुङ, १७ कात्तिक । प्रहरीले ७० क्युफिट काठसहित दुई युवालाई पक्राउ गरेको छ । फावाखोलाका दीपक विष्ट र ट्रयाक्टर चालक तेन्जिङ शेर्पालाई प्रहरीले नियन्त्रणमा लिएको हो । प्रहरीले उनीहरूसहित पातले कटुसको काठ बरामद गरेर जिल्ला वन कार्यालयलाई बुझाएको छ । छोडपुर्जी कागजात नलिई सदरमुकाम फुङलिङस्थित फावाखोला फर्निचर उद्योग सञ्चालन गरिरहेका विष्टले आयात गरेको काठसहित प्रहरीले मे १ त ३३ १२ नम्बरको ट्रयाक्टर नियन्त्रणमा लिएको हो ।
सशस्त्र प्रहरी बल कञ्चनजंघा गुल्मका डिएसपी भरतबहादुर बस्नेतले चेकजाँचका क्रममा अवैध रूपमा काठ भित्र्याउँदै गरेको भेटिएपछि नियन्त्रणमा लिएर जिल्ला वन कार्यालयलाई बुझाइएको बताए ।