अर्थबजार

दसैँको रातमा धेरै लोडसेडिङ

सौर्य अनलाइन २०६९ कार्तिक ५ गते २:३० मा प्रकाशित

काठमाडौं, ५ कात्तिक । लोडसेडिङका कारणले हिउँद वा वर्षाका रातमा उज्यालो कमै देख्न पाउने उपभोक्ताका लागि नेपाल विद्युत्् प्राधिकरणले दसैँको अवसरमा लोडसेडिङ घटाएका नाममा अँध्यारोमा बस्नुपर्ने उपहार दिएको छ ।
सोही कारण साताको ४८ घन्टाबाट ३० घन्टा घटाएर १८ घन्टामा झारिएको लोडसेडिङमा समेत उपभोक्ताले कमै उज्यालो देख्न पाउने भएका छन् । विजया दशमीको अवसरमा फूलपातीदेखि एक सातासम्म घटाएको लोडसेडिङ अधिकांश दिउँसोकै समयमा छ । पहिलाको तुलनामा समय कम भएपछि हप्ताको पाँच दिन साँझ वा राति लोडसेडिङ तालिका सार्वजनिक गरेपछि घटेको लोडसेडिङबाट उत्साहित भएकासमेत निरुत्साहित हुन थालेका छन् ।
सरकारी तथा उद्योगधन्दामा विदा भएर विद्युत् खपत भएकै कारण उनीहरूले पहिलेको तुलनामा कम अँध्यारो देख्न पाए पनि प्राधिकरणले प्राय: दिउँसोको समयमा लोडसेडिङ नगरी साँझ र राति गरेपछि लोडसेडिङ घटेको उत्साह उपभोक्तामा छैन । ‘दसैँभरि बत्ती नजाने भयो भनेर ढुक्क भएको छ, लोडसेडिङ तालिका हेर्दा त साँझतिर पो बढी छ,’ नयाँ बानेश्वरका उपभोक्ता ज्ञानु शर्माले भने, ‘पहिला लोडसेडिङ घट्यो भन्दा उत्साह थियो तर अहिले उत्साह पनि मरिसक्यो ।’ नेपाल विद्युत् प्राधिकरणले भने साँझ र राति बढी विद्युत् खपत हुने आधारमा त्योबेला बढी लोडसेडिङ गरेको जनाएको छ । प्राधिकरणअनुसार उत्पादित विद्युत्ले दिउँसो मात्र लोडसेडिङ गर्दा साँझ र त्यसपछि बढी खपत हुने कारणले अझ बढी लोडसेडिङ गर्नुपर्ने हुन्छ । पहिला दैनिक साढे ६ घन्टा गर्नुपर्नेमा अहिले साढे दुई घन्टामा झरेको छ ।
लोडसेडिङ कार्यतालिका अनुसार साँझ र रातको समयमा समूह–१ मा शनिबार र आइतबार मात्र लोडसेडिङ हुने छैन भने समूह–२ मा आइतबार र सोमबार, समूह–३ मा सोमबार र मंगलबार, समूह–४ मा मंगलबार र बुधबार, समूह–५ मा बुधबार र बिहीबार, समूह–६ मा बिहीबार र शुक्रबार तथा समूह–७ मा शुक्रबार र शनिबार मात्र लोडसेडिङ हुने छैन । अन्य दिनमा भने हरेक अँध्यारोमा लोडसेडिङको सामना उपभोक्ताले गर्नुपर्नेछ । माग ९६१ मेगावाट भए पनि करिब सात सय मेगावाट मात्र विद्युत् उत्पादन भएर दैनिक साढे ६ घन्टा लोडसेडिङ गरिरहेको प्राधिकरणको दसैँभरिको लागि घटाएको लोडसेडिङ उपभोक्ताले केही राहत त अनुभव गर्लान् तर दसैँपछि फेरि लोडसेडिङको समय बढ्दै जाने अवस्थाले भने उपभोक्तालाई निराश बनाउनेछ । ‘दसैँभरिका लागि अहिलेको कम लोडसेडिङ दसैँ उपहारजस्तै हो, दसैँपछि त उपहारको अवधि थपिन्छ, त्यसपछि त लोडसेडिङ कति घन्टा हुने हो, ठेगान छैन,’ प्राधिकरणका अधिकारीले भने, ‘विद्युत् उत्पादनका लागि सरकार नै संवेदनशील नहुँदा लोडसेडिङ समस्या समाधान कहिले हुन्छ, कसैले भन्न सकेको छैन । आगामी हिउँदमा १९ घन्टासम्म लोडसेडिङ हुनसक्ने प्रक्षेपण प्राधिकरणले गरिसकेको छ ।
त्यो प्रक्षेपणपछि ऊर्जा मन्त्रालयको समेत जिम्मेवारी संहालेका प्रधानमन्त्री डा. बाबुराम भट्टराईको निर्देशन अनुसार दैनिक १२ घन्टामा लोडसेडिङ झार्ने गरी लोडसेडिङ न्यूनीकरण कार्ययोजना ०६९ निर्माण भइसकेको छ ।

त्रिशूली–३ ‘ए’ स्टोरमा सिल

काठमाडौं : निर्माणाधीन
त्रिशूली–३ ‘ए’ जलविद्युत् आयोजनामा गुणस्तरहीन सिमेन्ट प्रयोग गरेर ठेकेदार कम्पनीले बदमासी गरिरहेको भेटिएपछि जिल्ला प्रशासन कार्यालयले आयोजनाको स्टोरमा सिल गरेको छ ।
चिनियाँ ठेकेदार कम्पनी चाइना गेजुवा ग्रुप अफ कम्पनी (सिजिजिसी) नेपाल विद्युत् प्राधिकरण र रसुवा जिल्ला प्रशासन कार्यालयका प्रतिनिधिको समेत उपस्थितिमा सिमेन्ट सिल गरिएको हो । केही दिनअघि निर्माणाधीन आयोजनाको निर्माणमा कमसल सिमेन्ट प्रयोग गरिएको र स्टोरमा समेत अधिकांश सिमेन्ट कमसल भेटिएको थियो । ती स्टोरमा रहेका सिमेन्ट हेर्दा डल्ला परेर काम नलाग्ने अवस्थामा भेटिएको थियो । देवीघाटमा रहेको स्टोरका १२ सय टन र आयोजनास्थलमा रहेको पाँच सय टन गरी १७ सय टनको करिब ३५ हजार बोरामा रहेका सिमेन्टमध्ये ८० प्रतिशतभन्दा बढी अम्बुजा नामको सिमेन्ट गुणस्तरहीन भेटिएपछि प्रशासनलाई दबाब बढेको थियो । २९ असोजमा गुणस्तरहीन सिमेन्ट प्रयोग गरिरहेको भेटिए पनि प्रशासनले बल्ल ३ कात्तिकमा मात्र सिमेन्ट सिल गरेको हो । सिमेन्ट ल्याइएको ९० दिनभन्दा बढी उपयोग गर्न पाइँदैन तर ६ महिनाभन्दा बढी म्याद गु्रजिसकेको सिमेन्ट प्रयोग गरिरहेको भेटिएपछि चिनियाँ कम्पनीको बदमासी सार्वजनिक भएको थियो । प्राधिकरणको सल्लाहमा गुणस्तरहीन सिमेन्ट सिल गरिएको प्राधिकरण उत्पादन तथा निर्माण विभागका महाप्रबन्धक रामचन्द्र पाण्डेले जानकारी दिए ।
आयोजना स्रोतका अनुसार सिमेन्टको गुणस्तर ५३ ग्रेड हुनुपर्नेमा २३–३३ प्रतिशत मात्र भेटिएको थियो । त्रिशूली ‘ए’ जलविद्युत् आयोजनाको क्षमता ६० मेगावाटबाट बढाएर ९० मेगावाट छिट्टै बन्ने र त्यसका लागि बढी सिमेन्ट चाहिने हुनाले ठेकेदार कम्पनीले धेरै परिणामा सिमेन्ट ल्याएको र आयोजनाको कामसमेत ढिलाइ गरेको कारणले बढी सिमेन्ट स्टोर भई जम्न पुगेको आयोजना स्रोतले जनाएको छ ।

 

 

 

प्रतिक्रिया

पछिल्ला अपडेट्स

लोकप्रिय