व्यवस्थित बन्यो विद्युत् प्राधिकरणको पार्किङ

काठमाडौं, २४ असोज । नेपाल विद्युत् प्राधिकरणले आफ्नो पार्किङलाई व्यवस्थित बनाएको छ । प्राधिकरणको आठ सय नौवटा सवारीसाधन छन् । त्यसमध्ये एक सयभन्दा बढी त प्राधिकरणको केन्द्रीय कार्यालयमा मात्र रहन्छन् । रत्नपार्कमा रहेको प्राधिकरणको पुराना भवनमा पार्किङ गर्ने ठाउँ नभएर ठूला विद्युत् आयोजनाका लागि लगानी गर्छु भनेर आउने विदेशी कूटनीतिदेखि लगानीकर्तासम्मले बिजोग अवस्थाको व्यंग्य गर्थे । तर, अहिले प्राधिकरणको बिजोग बनाउने पार्किङ व्यवस्थापन व्यवस्थित गरिएको छ
प्राधिकरणभित्रै रहेको महेन्द्र डिजेल पावर भत्काएर, ठूला ६ टयांक चिलिमे जलविद्युत् आयोजनालाई बेचेर र पोखरी भत्काएर अहिले पार्किङ व्यवस्थित गरिएको हो । प्राधिकरणको प्रत्येक भवनको मुख्य गेटसम्मै गाडी राख्नुपर्ने र हिँड्नसमेत बाटो नहुने अवस्थामा प्राधिकरण थियो । वर्षको ३० अर्बभन्दा बढी कारोबार हुने प्राधिकरणको पार्किङ अस्तव्यस्त भएपछि धेरैका लागि पार्किङ व्यवस्थापन टाउको दुखाइको विषय बन्दै आएको थियो ।
गाडी जामकै कारण निकाल्न नसकेर माइकिङ गर्नुपर्ने अवस्था प्राधिकरणको थियो । यद्यपि त्यो हटेको त छैन तर कम भने भएको छ । गाडी नै गाडीको जामका कारण अस्तव्यस्त देखेपछि धेरैले विद्युत् प्राधिकरण, विद्युत् उत्पादन र लोडसेडिङको समस्या उस्तै भएको भन्दै व्यंग्य गर्ने गरेका थिए । ‘कूटनीतिज्ञको अगाडि पार्किङ व्यवस्थापन गर्न नसक्दा प्राधिकरण लज्जित बनेको थियो, ठूलो समस्या पनि थियो ।’ प्राधिकरणका कायममुकामय कार्यकारी निर्देशक महेन्द्रलाल श्रेष्ठले भने, ‘पूरै व्यवस्थित त गर्न सकिएको छैन तर पहिलाजस्तो अस्तव्यस्त भने छैन ।’
‘अहिले भित्री भागलाई मोटरसाइकल र गाडी पार्किङ गर्ने व्यवस्था गरिएको छ,’ विभागकी प्रमुख शान्तिलक्ष्मी शाक्यले भनिन्, ‘३०/३५ वटा सवारीसाधन र धेरै मोटरसाइकल पार्किङ गर्न सजिलो भएको छ ।’ उनका अनुसार पहिला सवारीसाधन बाहिर निकाल्नुपरेमा घन्टौँ लाग्नुपर्ने अवस्थाको पनि अन्त्य भएको छ । प्राधिकरणले पार्किङ व्यवस्थापनका लागि करिब साढे दुई लाख रुपियाँ खर्च भइसकेको छ । प्राधिकरणसँग डेड करोड रुपियाँसम्मका महँगा गाडी छन् । पहिला देशका राष्ट्रपति, प्रधानमन्त्री, पूर्वप्रधानमन्त्रीदेखि ठूलाठूला नेता तिनै विद्युत्का गाडीमा रमाउने भए पनि अहिले त्यस्तो अवस्था छैन । तर, ती गाडीका पार्किङ गर्ने क्षेत्र भने साह्रै अस्तव्यस्त र बिजोग लाग्दो अवस्थामा थियो । ‘अझै प्राधिकरणको हुनुपर्ने पार्किङ व्यवस्थापन राम्रो भएको छैन, व्यवस्थित गरेर प्राधिकरणलाई अफिसियल रूपमा समेत विदेशी कूटनीतिज्ञदेखि सबैलाई ‘प्राधिकरण आउँm आउँm’ भन्ने वातावरण बनाउनुपर्छ’ प्राधिकरणका एक अधिकारीले भने । ती अधिकारीका अनुसार पहिलाभन्दा केही व्यवस्थित भयो तर यसलाई पर्याप्त नमानी व्यवस्थित पार्किङका लागि प्राधिकरणले पहल गर्नुपर्छ ।
दैनिक करोडौँको विद्युत् आयात गर्ने र जलस्रोतका लागि धनी मानिने नेपालको विद्युत् क्षेत्रलाई व्यवस्थित गर्ने निकाय प्राधिकरण ऋणमा भए पनि प्राधिकरणका गाडीहरूको ताँती देख्दा भने धेरै दंग पर्छन् । तर, ती गाडीको ताँतीका कारण प्राधिकरणको आँगनको जामले भने प्राधिकरण लज्जित हुने अवस्था रहेकोमा अहिले केही सुधार भएको छ ।