अर्थबजार

नाम मात्रैको परीक्षण उडान

सौर्य अनलाइन २०६९ वैशाख २६ गते २:५३ मा प्रकाशित

काठमाडौं, २६ वैशाख । पछिल्लो ६ महिनामा मुलुकका दर्जन बढी विमानस्थलमा परीक्षण उडान भए पनि कुनैमा नियमित उडान हुन सकेको छैन । निवर्तमान पर्यटन तथा नागरिक उड्डयन मन्त्री लोकेन्द्र विष्ट मगरको पहलमा भएको परीक्षण उडान नियमित हुन नसक्दा स्थानीयवासी निराश भएका छन् ।

कार्यकाल सम्हालेको केही दिनमै पहिला देश अनि विदेश घुम्ने उद्घोष गरेका विष्ट कार्यकालभरि नै घुमिरहे । मुलुकभर रहेका विमानस्थल पुन: सुचारु गर्ने भन्दै उनले परीक्षण उडान पनि गराए तर जनताको उत्साहबमोजिम विमान सेवा सञ्चालन भने हुन सकेन । जहाज अभावमा नेपाल वायुसेवा निगमले ती विमानस्थलमा नियमित उडान सञ्चालन गर्न सकेको छैन भने निजी वायुसेवा कम्पनी नाफा नहुने सेक्टरमा जानै चाहँदैनन् ।
आफ्नो कार्यकालमा विष्टले बैतडीको पाटन, दार्चुलाको गोकुलेश्वर, डोटीको दिपायल, अछामको कमलबजार, कञ्चनपुरको महेन्द्रनगर, कैलालीको टिकापुर, दाङको टारीगाउँ, बाग्लुङको बलेवा र पूर्वी नेपालको इलामसम्म विभिन्न विमानस्थलमा परीक्षण उडान गराए । बन्द विमानस्थल पुन: सञ्चालन गर्ने आश्वासन दिएर उनले स्थानीयमा आशा जगाइदिए तर कुनै पनि विमानस्थलमा पुन: जहाज गएन । मन्त्री विष्टको कार्यकालमा विभिन्न जिल्लाबाट ३१ वटा नयाँ विमानस्थल निर्माणको माग आएको मन्त्रालयले जानकारी दिएको छ ।
नयाँ आन्तरिक विमानस्थल निर्माण गर्ने भन्दै मन्त्री विष्ट काभ्रे, इलाम, धरान, सोलुखुम्बु, बर्दियालगायतका जिल्ला पुगे तर कुनै पनि ठाउँमा विमानस्थल निर्माणको थप प्रक्रिया अघि बढेको छैन । मुलुकभर विमानस्थल निर्माण तथा सञ्चालनको जिम्मेवारी पाएको नेपाल नागरिक उड्डयन प्राधिकरणका अधिकारीहरू व्यापारिक कोणबाट फाइदा हुने नदेखिएसम्म विमानस्थल पुन: सञ्चालन गर्न नसकिने बताउँछन् । मुलुकभर रहेका ५४ विमानस्थलमध्ये ३५ वटा मात्र सञ्चालनमा रहेको प्राधिकरणले जनाएको छ ।
मन्त्रालय सम्हालेको एक महिनापछि पत्रकारसम्मेलन गरेर विष्टले बन्द विमानस्थल पुन: सञ्चालन गर्नेलगायतका अल्पकालीन र दीर्घकालीन योजना सार्वजनिक गरेका थिए । जहाज खरिद गर्ने, दोस्रो अन्तर्राष्ट्रिय विमानस्थल निर्माण गर्ने, मुलुकका सबै भागमा हवाई सेवा पुर्‍याउने, सन् ०२० सम्म पर्यटक दशकको अवधारणाअनुरूप ती क्षेत्रको गुरुयोजना तय गर्ने, त्रिभुवन अन्तर्राष्ट्रिय विमानस्थलको गुणस्तर तथा सेवा सुविधा विस्तार गर्नेलगायतका महत्वाकांक्षी योजना उनले अघि सारेका थिए ।
त्यस्तै तत्काल आन्तरिक र बाह्य हवाई सेवालाई सुरक्षित, बजारमुखी र अन्तर्राष्ट्रिय मापदण्डको सुविधाअनुरूप सञ्चालन गर्ने तथा निजी क्षेत्रको भूमिकासहित समावेसी, पिछडिएका वर्गले समेत लाभ पाउने गरी स्थापित पर्यटकीय स्थलको संरक्षण र प्रवद्र्धन तथा नयाँ पर्यटकीय गन्तव्यको पहिचान, विकास र प्रवद्र्धन गर्ने योजना उनले अघि सारेका थिए । ३४ बँुदे उनका कुनै पनि योजना पूर्ण भने हुन सकेनन् ।
केही महिना काम गर्न पाए नेपाल वायुसेवा निगमका लागि जहाज ल्याएरै छाड्ने घोषणा गरेका पर्यटन तथा नागरिक उड्डयन मन्त्री लोकेन्द्र विष्ट मगर विनाकुनै महत्त्वपूर्ण उपलब्धि विदा भए । सात महिनाअघि मन्त्रालयको जिम्मेवारी सम्हालेका विष्टको कार्यकालभरि नै जहाज खरिदको विषय चर्चामा रह्यो तर जहाज आउन सकेन ।
विष्टको कार्यकालमा अगाडि बढेको चिनियाँ जहाज खरिद प्रक्रियामा विवाद आएपछि बीचमै रोकियो । मन्त्री विष्टले कार्यकाल सम्हाल्दा अघि बढेको नेपाल पर्यटन बोर्डको प्रमुख कार्यकारी अधिकृत छनोटको प्रक्रिया अहिलेसम्म पूरा हुन सकेको छैन । यो विषय अहिले अदालतमा विचाराधीन छ । खरो र हठी स्वभावका विष्ट विनाभिसा जर्मनी उड्दा आबुधावीमा रोकिए जसका कारण मुलुककै बेइज्जत हुने अवस्था आयो ।
पर्यटन वर्ष ०११ को अन्तर्राष्ट्रिय प्रवद्र्धन सुरुवात तथा लुम्बिनी भ्रमण वर्ष ०१२ र पर्यटन दशक ०२० को घोषणा उनको कार्यकालमा भएका केही महत्त्वपूर्ण काम हुन् । लुम्बिनी भ्रमण वर्षका लागि पर्यटन र संस्कृति मन्त्रालयबीच समन्वय नभएको भन्ने गुनासो आइरहेका बेला संस्कृति मन्त्रालय पनि पर्यटनमै गाभिएपछि सहज हुने भएको छ ।
मन्त्रालय मातहतका निकायहरू नागरिक उड्डयन प्राधिकरण र वायुसेवा निगममा कार्यकर्ता भर्तिगरेर उनले आलोचना खेप्नु परेको थियो ।

प्रतिक्रिया

पछिल्ला अपडेट्स

लोकप्रिय